风光背后患怪病！黄浩然险死 官恩娜面瘫合唔埋眼瞓觉

etin

艺人蔡少芬（Ada）半夜突然上载血染纸巾照吓坏唔少网民，佢就解释系“手多多”加上天气乾搞到流鼻血，连搭飞机都会流，不过话流就流令网民都叫佢小心身体，其实有唔少艺人风光背后却被“怪病”缠身！好似黄浩然咁挨到病，起初以为只系扁桃腺发炎，点知睇医生先知系患上贝塞特氏症，因为休息不足及压力大而引致，患者不只口腔溃烂，严重会导致生殖器官溃疡，更分分钟会死！当时佢更要辞演《张保仔》由洪永城顶上，最后住院半个月先逐渐康复，但瘦咗10几磅，佢讲笑叫大家唔使担心佢生殖器官出事！不过经历一场大病，佢都唔敢太搏，宁愿减产专注家庭！

当时仲未结婚生仔、依然活跃娱圈嘅官恩娜（Ella）忽然面瘫，出席活动时喊住透露一边面郁唔到、想笑又笑唔到、只眼又眨唔到，原来系患上贝尔氏麻痹症，当时佢要服用高剂量类固醇，用人工泪水，夜晚瞓觉要手术胶纸黐住只眼，如果唔系合唔埋眼瞓唔到！当时男友即依家嘅老公陪佢走过人生低潮，两人现时育有一对仔女，幸福美满！

除咗Ella，罗家英10年前都患过同样疾病贝尔氏麻痹症，因为感冒菌入侵第7对脑神经线所致，半边面部肌肉失调犹如中风，幸得到汪明荃照顾，加上及早治疗，好快康复。

周海媚（海味）1998年患上红斑狼疮症，正值上位时期嘅佢要停工休养，不过病情反覆令佢生活工作都大受困扰。一直未有承认患病嘅海味，早前曾表示只系患有血小板减少症，医生曾同佢讲若生育嘅话会有生命危险，令佢唔想结婚生仔，错失过2段美好姻缘。

而有“娘娘”之称嘅杜小乔，早年大方透露患上红斑狼疮症，患病初期佢更有肾炎，严重时每日要食16粒药丸，虽然系咁，但佢一啲都唔介意分享，更积极面对！