男神张智霖(Chilam)同天王郭富城及时装王国老板沈嘉伟出名系老友,唔只爱车又锺意约埋去“滚”,仲系麻雀脚嚟!最近佢接受伍咏薇(伍姑娘)及林盛斌(Bob)《Tiger`s Talk 》访问时,就讲到自小就学识同锺意打牌,放学后逼家姐陪佢打,直到依家都会打,可以减吓压!
伍姑娘提起Chilam嘅对手系城城及沈嘉伟,身旁嘅黄宗泽就笑言:“所以佢唔赌钱,打车!”之后Chilam就被逼供讲赌几大,佢就多次回避,强调:“几细都会打,好细㗎咋!”阿Bob就追问:“每晚几多钱上落?”Chilam就话一餐饭㗎咋,食吓拉面咋!Chilam就话因为成日打,唔可以博晒命!伍姑娘就问佢有冇6位数字?佢不断否认,直至问到有冇几千蚊时,佢就谂咗谂:“千零蚊咁啦!”即时令伍姑娘企起身话佢系“大话精”!
讲到家庭时,Chilam直言好大压力大,仔仔魔童依家13岁,有自己社交圈子,感觉到关系开始疏离,佢话:“寻日仲揽住瞓,今日就话Don't touch me,好Hurt!”因为佢觉得自己系男人,唔好再揽揽锡锡!妈咪袁咏仪都唔掂得!依家成日睇番仔仔小时候嘅片怀念,点知阿仔就叫佢:“Delete it!”佢笑言好惨,不过直言家庭生活系开心嘅!
|