裕美爆饭局受辱 被开价3千万卖子宫

etin

艺人裕美原来是“富二代专业户”，现跟自称有逾亿身家的前大律师林作拍拖外，入行前已有富家子排住队追求，更遇过出千万利诱她“卖子宫”的才俊，还有“另类商演”邀约，总之点头就财来自有方；而林作为女友平反，大爆月入逾百万的她，早不是“穷歌女高攀富二代”，更为可以“食软饭”而自豪。38岁的裕美7年多前被爆搭上36岁的林作时，因学历、财力及家庭背景等差天共地，网友剥花生等她被“𡁻完撇”，但二人日前在市价约4,000万的中半山豪宅接受专访，林作爱到出口谓：“今年11月1日就系我哋拍拖8周年纪念日。”但裕美却藐爆：“我唔记得喎，冇7年之痒，同佢一齐后直情反胃，冇晒食欲。”
虽然裕美经常被男友激到翻白眼，但真心觉得林作在众多富二代追求者中，相处得最舒服。她自言其实最憎与富二代拍拖，原因是：“佢哋不可一世，以为多人锺意系因为靓仔，其实啲女锺意佢屋企有钱咋，佢哋醒未呀？”问她是否很多与富二代拍拖的经验？她直认“十几个一定有”，还分享未入行时被有钱仔追求的经历：“我14岁时有个富二代揸跑车嚟接我放学，同佢拍咗一个礼拜拖就顶唔顺分手。（点解？）佢成世都未食过汉堡包，饮杯水都要落燕窝，佢分分钟唔识绑鞋带，我唔想凑仔啰！”裕美入行24年，见尽娱圈的纸醉金迷及荒诞事，大爆曾被要求“卖子宫”，在公司饭局上被“老板”当众侮辱：“有个唔系香港人嘅男人大声同我讲：‘你屁股好大喎，畀3,000万你帮我生仔’，嗰刻好火滚，如果佢唔系30、40岁又好样，我一巴‘车’埋去。
虽然咁高价都算有诚意，但我心谂见到钱再讲啦，讲就1亿都得啦！况且我系有原则，又担心被人‘唱’，听过有钱仔炫耀同女明星拍拖。”林作闻言大叹未曾遇上这类“笋Job”，自夸“精力”旺盛。裕美再爆另一宗“秘闻”，指在经济最困难时，有娱圈出名的“女中介人”邀她离港“登台”，她说：“凌晨打嚟话有临时Job去澳门陪老板食饭、赌钱，有6位数，问我可唔可以立即出门口；之后又话去新加坡，不过1个月只可以返香港1次，有几十万，凼到老板开心仲会多啲钱。”只是警惕性强的她感觉太危险而拒“落叠”，加上她不爱应酬，豪气地说：“听到‘凼老板’最反感，我锺意唱歌，唔系返夜总会。”身边的林作即谓：“咁似‘KK乐园’（卖猪仔）嘅。”他又恨到出口表示自己愿出外“登台”，自言不怕蚀底。
问到可相信圈中有“包养”之事，裕美秒说：“信！”更知对方姓甚名谁，并谓：“咁我知佢咩背景出身嘛，突然全身名牌又住大屋咁富贵喎！不过唔会歧视佢，每个人都有选择，或者佢好需要钱嚟买大量名牌，我唔会阻佢。”林作得知女星是裕美朋友，即不停叫她开名，“八公”本色表露无遗。谈及裕美被酸民嘲讽为“专黐有钱人的心机女”，林作挺身为女友平反：“唔计家族财产，单讲搵钱能力同个人资产，佢赢咗我3、4年，裕美做KOL目标系1个月搵100万！（你有冇自卑？）系梦想成真！阿妈教我要搵个叻过自己嘅女人，有咩事都可以‘食软饭’，同埋我锺意多经历嘅女人，佢咁多男朋友，一定系姣婆，好正。”裕美早已成功脱贫，但明言绝不花钱在“算死草”的林作身上，她解释：“我成日同啲姊妹讲唔好养男人，首先搵钱唔容易，同埋啲男人唔还钱之馀，仲可以一脚伸开你。我有今日都要多谢林作妈咪，因为佢阿妈曾经睇唔起我，我先咁发愤！”