钟嘉欣佛山骚父母撑场座无虚席 爆细女靓声后继有人

etin

艺人锺嘉欣一连三场的“Remember记得・锺嘉欣演唱会”佛山站，前晚（1日）在岭南明珠体育馆圆满落幕，继早前在广州开骚后，嘉欣相隔3个月再举行个唱，反应依然热爆，3场均座无虚席，她更罕有获父母及细囡Anika由温哥华到佛山捧场，难怪嘉欣指佛山站演唱会，对她来说别具意义。跟之前广州站一样，她以经典金曲《一颗不变的心》为演唱会揭开序幕，不过个唱流程、舞台设计、服装及灯光效果却截然不同，她说：“有咗上次经验，今次心态有啲唔同，亦都变得轻松咗，今次重点反而系点样令个演唱会进步，睇番之前嘅片段、观众嘅反应，从而去调节，希望每场演出都畀到观众新鲜感，令观众觉得值得嚟睇，亦因为每场嘅变化，令自己有一份刺激感。”

嘉欣指，佛山站演出除保留“扔花球”，还加插“民选”歌曲环节，她表示：“扔花球环节，我同样会亲手写上一个特别Message放喺花球，但今次我最难忘系民选歌曲环节，事先畀网民拣选喜欢嘅歌曲，然后我再去唱；仲有一个环节，系观众一齐唱《月亮代表我的心》，令我好感动，因为我依家住得比较远，但仍然可以心连心，保持着呢种关系系好难得，当望见月亮时，不论身在何地，仍然好似连系住咁，而呢首歌，亦系剧集《护花危情》一首好重要嘅歌，好代表到我嘅爱。”在广州站中，一班好姊妹及好友到场，令嘉欣大感惊讶，而今次佛山站亦有“重量级”观众撑场，她说：“系我好重要嘅人嚟睇我演唱会，佢哋系我阿爸阿妈同埋细女，其实我入行咁耐，阿爸阿妈好少机会睇我演出，阿爸直头系未睇过，好开心佢哋终于可以睇到，亲身见证佢哋个女努力嘅表现。因为我大囡同个仔都要返学，所以净系细女嚟，佢都系第一次睇我演出，佢嘅反应好兴奋，虽然佢戴住耳塞，但都睇到又跳又唱。”

​Linda续说，献唱《做你的晨曦》时，被观众席上的妈妈感动到喊，她表示：“呢首歌系讲我对女儿嘅爱，因为今次妈妈在场，唱呢首歌时会忆起好多妈妈凑我嘅回忆，令我忍唔住喊，冇谂过自己会喊，好感动，所以每次望到观众席上嘅爸爸妈妈同个女，我都要避开视线。”提到细女Anika，嘉欣表示三名子女当中，她觉得Anika最有机会继承其表演的衣钵：“佢虽然最细个只有两岁，但性格比较外向，把声好大声又清脆，唱歌应该会几好听，而且佢一听到音乐及拍子声就会跳舞，好有节拍感。”个唱后，她透露将一家五口来港过圣诞节，对此一家心情十分兴奋，她说：“老公疫情后都返过香港，佢好期待，因为佢有好多亲戚喺香港，其实三人小朋友都嚟过香港，佢哋好锺意香港呢个地方，觉得香港好方便、好多姿多采，就算行街买衫嘅款式都畀加拿大多，每次返嚟香港，佢哋都会学到好多广东话，我都想带佢哋返嚟多啲。”