|
前日(21日)黄色暴雨突袭香港,周日巨雨搞到大家都冇得去玩,清水湾更有水龙卷报告,就知天气有几恶劣。“十优港姐”麦明诗上个月下嫁飞机师老公盛劲为,佢因为“唧牙膏”式甫出结婚相而惹众怒,不过好快佢又凭三吋不烂之舌重夺网友好感。估唔到前日黄雨日,佢一早就约咗班亲戚一家大细去主题公园,点知就撞正狂风暴雨,佢上载片段见到横风横雨吹到小朋友尖叫声此起彼落,完全入唔到公园。​见佢以小背心上阵,同着晒雨褛嘅盛劲为好大对比,虽然因天雨关系冇得去玩,不过二人都笑到四万咁口,麦明诗仲留言自嘲刚做舅母就失败收场:“今日星期日难得约到成班亲戚一家大细去主题公园,做个称职嘅舅母带两个姨甥同动物say hi。出门口嘅时候啲雨落下落下,谂住大部份时间都系室内睇动物应该OK。点知自己过分天真,一到公园门口就狂风暴雨,搞到成班人好似走难咁款。唉刚做舅母就失败收场,好彩有几只动物公仔凼住两个小朋友话下次再嚟过。#打波先嚟落雨 #择日重赛 #安全至上”而盛劲为就发挥搞笑本色,以经典广告台词留言:“唔通连个天都唔锺意我?”
|
|