李施嬅争视后平常心：TVB冇欠我嘢！

etin

艺人李施嬅在热播剧《新闻女王》中饰演的主播“张家妍”不畏强权据理力争，与“Man姐”佘诗曼（阿佘）斗气又斗戏，绝对是观众最期待的画面，两位好戏之人更被睇好能冲击视后奖座！对此，已是“双影后”的施嬅否认志不在此，直言阿佘攞视后是实至名归，自己则不够胆去想，就算没有，亦不认为是TVB欠她一个视后。李施嬅在剧中因受到“飞爷”邓智坚及Man姐多年来的打压，内心鬱鬱不得志，有指她会变节作出大反击，施嬅不讳言：“张家妍有好多嘢屈住屈住，睇吓个人去到咩点，几时会爆，爆嘅时候就系要还击嘅时候，好多网民问家妍几时黑化，佢唔系黑化，系一个人生嘅经历，同时亦系好理所当然嘅，当一个人去到某个绝路时，你始终都要去反抗。”现实生活中，施嬅亦有过类似被欺骗及被跣的经历，虽然详情已记不起，但她表示自己比张家妍睇得更化，也不会纠结在事情上；

相反，Man姐处事圆滑又懂得做人，但张家妍却得罪人多称呼人少，施嬅说：“其实我同张家妍有啲似，我同佢一样都系好热爱工作，但我冇佢咁极端，我比较理性，唔开心总有一日会过去，所以唔使咁执着。”施嬅和阿佘在剧中斗个你死我活，两人“戏”场大开，看得观众拍案叫绝，甚至睇好两人能冲击视后。对此，施嬅直言已很多年没有想过：“上次《金宵大厦》又系，呢啲唔到我控制就唔会去谂，唔好畀自己咁大压力，我觉得阿佘攞视后绝对系实至名归，佢有资格有能力，所有嘢都系合理嘅，如果我攞到梗系开心啦，但我唔够胆去谂呢样嘢，同埋我又觉得攞唔攞TVB个视后，唔系决定我嘅人生开唔开心，呢样嘢当然系一件开心事，但得唔到亦唔会令到我嘅人生改变任何嘢，或者会令到我失落。”施嬅非常感激TVB在她离巢后仍找她演出好剧集：“系好感恩嘅，有啲人话‘TVB争你一个视后’，我真系唔觉得佢哋有争我任何嘢，而佢哋畀到我嘅嘢，系多过争我嘅任何嘢，所以我觉得唔需要谂得太多，总之平常心。”

她又谓当初接了张家妍这个角色后，最担心观众觉得她乞人憎：“我真系毫无保留去做啲嘴脸、反眼嘅表情，可以好乞人憎嘅，所以我都希望大家会明白只系做戏；第二，希望大家睇得又爽又开心；第三，就系同啲演员拍得好爽好正，呢啲已经达到咗，所以好开心喇！”于2017年凭微电影《Once More》夺得国际性European Cinematography Awards和Los Angeles Film Awards“最佳女演员”的施嬅，成为双影后，是否志不在TVB的视后？她说：“唔可以话志不在此嘅，始终呢个系我长大嘅地方，佢哋畀啲乜嘢我，我都觉得好有意义，但如果要执着呢样去代表我嘅开心，我亦唔会摆到咁重要，如果系咁嘅话，我就真系好难开心，咁多年都冇实好灰。其实每年都会有啲好叻嘅人，好似《金宵大厦》嘅角色挑战惠英红同杨千嬅两个影后，系咪输咗会唔开心呢？又唔系喎，每个人攞都系实至名归嘅，难得每次都畀啲咁劲嘅对手我，我觉得仲刺激仲开心。”