|
艺人滕丽名喺《爱.回家之开心速递》中表现亮眼,完美嘅演绎更喺将“熊尚善”一角深入民心,而最近受邀上访谈节目嘅滕丽名,更罕有公开分享同金融老公朱建昆嘅感情状况,引嚟唔少网友睇到哗哗声呀!
向来比人“女强人”感觉嘅滕丽名,提起同老公嘅点滴时,难得表现出“小鸟依人”嘅一面,讲到兴奋处仲会笑得劲甜,剩系睇反应就知滕丽名同老公有几恩爱,而滕丽名亦分享同老公第一次见面嘅经历:“如果嗰个男人对你有兴趣嘅话,佢剩系唔会同你讲嘢,而呢样嘢系吸引到我嘅注意,嗰阵佢派卡片,剩系唔派畀我一个,我唔明佢点解唔派畀我?究竟发生咗乜事?”并表示之后喺朋友聚会上,间中都会见到老公嘅出现,之后2人亦慢慢发展出感情。
另外,滕丽名亦分享道自己向来锺意“Man啲”嘅男人:“我锺意人有好多唔同嘅嗜好,样样都识啲就会觉得好Man,会崇拜佢,就算佢好凶狠,我都会好崇拜佢,我老公最吸引我嘅地方,佢系一个好冷静嘅人,发生乜嘢事都可以好冷静,呢一点我系好佩服佢。我记得曾经有人讲过,一对好夫妻,如果可以维系得好,系个老公好冷静,个老婆会比较刚烈,呢段关系就会相处好融洽,我老公嘅情绪控制得好好,呢样系几欣赏佢,而且佢又好多嗜好,我唔使担心佢会闷!”简直系为滕丽名“度身订造”嘅梦中情人呀!
|
|