早排到内地拍剧3个月嘅洪永城(Tony),日前终于返港,咁耐冇见屋企人当然要即刻飞返去揽吓大家啦,佢太太梁诺妍(Inez)就喺社交网发放短片,留言:“爸爸?古怪叔叔?洪宝傻傻分不清,期待了呢个画面好耐,3个月后终于见返,究竟系爸爸想念到哭定系洪宝认唔出到哭?定系认得唔哭?睇片睇真相!最后仲话自己要扮外国人做咩事?” 片中Tony返到屋企谂住行埋去掂吓前世情人只手仔,点知囡囡个样呆咗一阵,之后就大喊出嚟,明显唔认得爸爸,可怜嘅Tony即刻双手掩面扮可怜,之后Inez就尝试将手中嘅女女交畀Tony,结果囡囡大喊、Inez就喺度大笑,仲对住镜头话囡囡平时唔怕陌生人添,好在屋企只爱犬仲认得Tony。结果15分钟后,Tony扮外国人用英文同囡囡讲嘢,奇怪地囡囡就唔再喊喇,认真搞笑。圈中好友纷纷留言话笑爆嘴,李佳芯留言:“阴功,但好好笑”,同样身为爸爸嘅杨潮凯就留言话:“我明,我完全明白,因为我试过”。
|