马国明笑汤洛雯佗B实好论尽 要去外国搞婚礼

etin

无綫花旦汤洛雯与马国明爱得低调，鲜有放闪，多次被问及婚事时都婉转唔讲，反而早几日就佢哋就晒出背光心心相，搞到大家以为佢哋好事近，有好消息宣布，不过都系大家谂多咗。反而好友陈敏之晒出搵马国明做个人Channel嘉宾嘅新片，入面就大讲马国明对婚姻生活嘅向往，连汤洛雯会做大头虾妈咪，仲会凑住一对活泼嘅小朋友添！

​佢被陈敏之问道同汤洛雯嘅相处时，马国明爆料女友大头虾、多甩漏，仲已经担心定对方将来大肚，好惊佢会成日失足跌倒：“佢好大头虾，佢成日唔见啲文件，我反而好整齐，啲好紧要嘅信我会收埋。我成日都话佢，如果第时我哋有咗仔女，嗰啲考试证明书你全部都唔见晒咗，出世纸都可以唔见。我都好担心佢，佢有时行行吓街都跌亲，我哋都会研究呢啲问题，如果佢第日大咗肚，如果有呢个机会…（惊佢仆亲？）系呀，都唔知点算好。”马国明仲讲到明系去外国行礼，最好就系海边加阳光与海滩，成个结婚Plan都出晒嚟，睇嚟佢哋都倾好晒喇喎！