攞命七宗罪 ︱孙慧雪爆外佣失联 要求去男友家过夜

etin

艺人孙慧雪系一子之母，艺人开工时间唔稳定，家中大小事就靠晒外佣姐姐帮手打点，不过佢都成日晒出同仔仔亲子时间嘅Post，几忙都自己嚟。但佢近日就换咗位新姐姐，昨日（26日）凌晨佢向网民请教，话姐姐放假到当晚2:33am都唔返屋企，唔知应该点做，转头佢更爆料，原来呢位新姐姐第二次放假已去搵男朋友，仲讲到明想喺对方家中过夜添！最后姐姐清晨6点终于返到，一直瞓到早上11点几起身，又同孙慧雪讲自己唔舒服所以唔返，激到孙慧雪即刻同佢“分手”。

之后孙慧雪亦大爆呢位“绝顶姐姐”嚟到开工之后，至少有攞命7宗罪，包括失联、唔肯做家务，要求每晚都要有me time做运动等，更夸张到第一日入屋，就推咗佢屋企只窗落街，真系睇到网友都目瞪口呆，大赞佢够决绝，明显姐姐唔适合照顾佢同佢屋企人。

孙慧雪社交网发文：“1.本来应该到嗰日，即第一日，佢失联，后来再出现话前雇主帮佢搞farewell party, 所以失踪咗一日；

2. 嚟到唔做嘢，我洗衣篮倾泻，我哋问佢系咪唔识用洗衣机啊？，不如教你呀，佢话：我识呀，已经帮自己洗咗几机衫，然后我先发现，系喎！晾起全部都系佢啲衫！

3. 佢嚟到第一日，要求每晚都要有me time做运动，都唔紧要，但系佢晚晚一早就自己收工，唔会再帮手，然后攞瑜伽席，换晒full set运动衫，做瑜伽！跟住又系洗自己啲做完运动嘅full set运动衫唔系我哋啲衫⋯⋯

4. 面试时，佢话自己好内向，唔锺意出街，剩系会匿喺屋企，除非有紧要事要办先出去，下午两三点都已经会喺屋企，结果第一日放假，佢话夜晚11点先返，我哋O晒嘴，话佢interview都唔系咁讲，佢话我锺意匿喺男朋友屋企，可能我帮惯外国人做嘢啰，同你哋style唔同

5.佢做咗几日，表明自己就做唔晒啲嘢㗎啦，你哋请多个姐姐嘅时候，我再同佢倾，点样合作做你哋屋企啲嘢啦其实我屋企只得我、老公同小朋友，小朋友已经尽量自己凑，接送都系我同老公，有家教老师喺度嘅时候，佢都唔帮我哋执床，自己去咗me time

6. 最夸张嘅系：第一日入屋，佢用神力推咗我屋企只窗落街！！！！真系非常好彩系，无伤到人！！！之后佢同我讲， 只窗系自己跌咗落街！（注：只窗喺工人房）

利申：我哋屋企系新装修，仲要有验窗，可能系之前啲姐姐整松咗，都唔可以完全怪晒佢嘅！不过系我人生入边一件好难忘嘅事！

7. 叫佢帮我哋攞嘢，佢话佢攞唔到，叫我哋自己攞

太多⋯⋯不能尽录！”