黄嘉乐娶得美人归：一拍拖已问佢几时嫁畀我？

etin

无綫艺人黄嘉乐早前向拍拖5年的圈外女友Samantha求婚成功，二人将于8月19日在酒店举行婚宴，向来专一的嘉乐一直视女友为终生伴侣。说到决定今年结婚，嘉乐与Samantha接受访问时坦言一次饭局中，“细妹”及“细佬”唐诗咏、林子善不停“催促”下，二人便开始着手筹备。嘉乐说：“我向来谂嘢好理性，觉得结婚要用好多钱，所以一直喺度储钱，但有日食饭诗咏好认真问我‘你谂住几时结婚呀？’跟住子善又话‘系啦！唔使谂咁多㗎！有我哋Support你！’返去计完条数，原来可以喎！咁就去做，其实我一直都好想快啲同佢结婚，拍拖第一年已问佢几时嫁畀我！”

求婚过程笑料百出

一般男士向女友求婚，气氛一定好浪漫，但嘉乐的求婚过程完全笑料百出，不过Samantha表示当时好有惊喜。她笑言：“因为我冇谂过佢会做呢样嘢，我记得好多年前曾经同佢讲过，如果成棚人做呢件事会好似做SHOW咁，我亦曾经幻想佢求婚系会喺屋企攞只戒指出嚟！佢唔会系嗰啲Book间餐厅求婚嗰啲嚟！”说到嘉乐不是浪漫型时，他即自辩说：“我觉得我好浪漫㗎喎！我畀好多惊喜佢㗎！”Samantha说：“佢系好实际！佢唔会Book间餐厅点晒蜡烛嗰啲嚟！”不过听了嘉乐说了他的求婚过程后，其实他本意都是充满浪漫及仪式感的，只是期间发生很多不预期的小插曲。

​未婚妻惊喜尖叫

嘉乐回忆求婚当日情况说：“我记得佢曾经讲过想睇蓝眼泪，有晚我就约佢去睇！当然我已经准备晒戒指同一大束花。”嘉乐当晚悉心装扮去接Samantha，但她一心去睇蓝眼泪的她竟然穿拖鞋、沙滩装，嘉乐即问她：“你唔化妆呀！一阵睇蓝眼泪要影相嘛！”Samantha都没有察觉甚么，只是化了少少妆出发。到达目的地，她投入的踢水、玩水，此时嘉乐就战战兢兢拿出戒指，当时Samantha惊喜尖叫一声！戴上戒指后甜言蜜言还未出口，她已走回去玩水，嘉乐当时说：“喂！你唔答我嘅？”她便戏弄他说：“搞错呀！求婚又冇花又唔跪低！”

靓跑到场助兴

跟着嘉乐于车边攞着戒指、花束跪低打算将求婚过程完整做一次时，二人认真之际，突然有3架名贵跑车停在面前，他说：“佢以为我安排咗朋友嚟，3部车停得好靓，太戏剧嘞！点知原来系3个男仔带3个女仔嚟睇蓝眼泪，佢即刻叫我起身。”Samantha笑言：“我做过咁多场婚礼摄影师，听过好多动地惊天承诺，点都会有啲，但我自己嗰晚系乜都听唔到啰！哈哈！不过其实过程都好开心，但几切合我哋人设，我哋平时都好Kai！”

问到二人婚后会否打算生小朋友时，Samantha指要生小朋友，一定要教导得很好，她笑言：“我哋都锺意小朋友，唔抗拒嘅，但好多嘢需要配合，随缘啦！”而嘉乐指早前养了一只猫，发觉自己原来好有父爱，他说：“如果将来有小朋友，我一定系严父嚟！”