一年一度父亲节,做仔女嘅都会送礼物凼吓爹哋开心,身为人父嘅艺人张继聪就收到佢囡囡张靖(Karina、乳名Kakaball)以卡纸同丝带亲手整嘅奖牌,上面仲写有“I Love You”几只字,冧爆嘅阿聪就当然即刻将奖牌挂上身兼打卡啦,之后佢喺社交网甫相留言:“妹妺亲手整嘅,仲要搭多句‘嗰时啲天使叫我拣一个Daddy,我系专登拣你’,问你怕末?”、“有人话我几十岁人先畀女呃,唔知佢咩居心。”
网民真系畀佢两父女闪到盲,纷纷留言:“果然系亲生女,遗传晒爸爸啲口甜舌滑”、“系前世情人呀!妹妹真系好Sweet”、“天使老点 Kakaball...”有网民就叫佢全日都挂喺身,甚至揸电单车都戴住件礼物上身,而阿聪太太谢安琪(Kay)亦有留言:“威啦威啦!”醋意浓浓咁,莫非佢就系阿聪提及嘅嗰位“有人”?
|