谭凯琪演恐怖人妻“奸”上位 感激老公做最强后盾

etin

艺人谭凯琪（Zoie）破格变“奸”引起热话，然而这个现实生活中的幸福人妻，获丈夫支持继续追梦，对方更全力照顾家庭。谈到以往情路上起跌，她直言曾试过因猜疑完全丧失自我，如今懂得惜福感恩。

Zoie产后约5个月，复工接拍无綫热播剧《十八年后的终极告白2.0》，并一改以往戏路变得深谋远虑，死前一刻依然与“丈夫”谭俊彦（Shaun ）斗智斗力！她感激今次团队的帮忙：“个剧本好完整，加上Shaun同陈山聪嘅帮忙，佢哋好专业，令我好容易投入，只系产前已经休息咗年几，拍摄时又要兼顾家庭，好似冇晒记性咁，自己忟自己，惊阻人收工嘛。（嚟紧想再挑战啲乜？）专业人员，或者好粗鄙咁去演喜剧，应该都有啲难度。”

剧内感情路非一般，现实生活中Zoie与丈夫却相当恩爱。问到她最欣赏对方甚么，她坦言﹕“佢份人好踏实，冇乜花言巧语，同佢相处舒服。佢所有嘢都系以我好为出发点，咁样已经够嘞。（以前拍拖冇乜试过互相猜忌？）细个嗰时拍拖，都会成日猜测对方嘅，但与此同时就发觉冇咗自己，唔健康之馀亦浪费光阴，搞到成个人好攰。当时我就同自己讲，点都要拣个值得信任嘅人。”

对于太太继续拍戏追梦，Zoie丈夫不单全力支持，更帮手照顾屋企﹕“我拍完套剧之后，发现囡囡好黐爸爸，例如陪瞓、半夜喂奶咁，囡囡都一定要爸爸，但我又唔会呷醋，一嚟想囡囡多啲人锡，二嚟我老公除咗工作外，真系将所有时间花喺囡囡身上。”囡囡甫开声说话便叫爸爸，样子更加如父亲一般，Zoie笑说：“所以老公咪更加紧佢啰。”

问到有否打算再追B，Zoie表示未有认真与丈夫讨论，一齐听从天意﹕“好多人叫我追多个陪囡囡，我就谂如果真系嘅话，就唔好隔太耐嘞，惊冇耐力再凑小朋友，但我觉得如果追唔到都有其他嘅办法，好似带囡囡多啲同同龄小朋友玩，佢都未见个山聪个仔，佢两个差几个月咋。”