艺人蔡少芬(Ada)闯荡内地市场多年,去年佢就同老公张晋及两女一子举家移居上海,可惜就遇上疫情封城,不过随着上海解封,Ada一家原来已经搬返香港,皆因有内地地产经纪将Ada间上海豪宅摆上网放租,并指业主一家啱啱搬走,租客可以即租即入伙!
据网上资料指,Ada喺上海所住嘅翠湖天地御苑位于市中心优越地段,单位系复式设计,面积达324平方米,共四房、两厅、四卫,家俬家电齐备,屋内装修豪华又简约,非常阔落。厅中间摆放L型梳化、木制茶几,加埋个大露台,明显住得舒适。而每间房都设落地窗,厨房就以白色橱柜为主,厕所亦有圆形大浴缸,真系够晒疏乎。
但系大家点知间屋系Ada嘅呢?因为张晋早前亦曾拍片公开屋内环境,当时Ada同仔女喺大厅玩VR,屋内摆设同格局同经纪上载嘅相由梳化到窗框等,都系一模一样,加上张晋曾晒出多张Ada喺屋企露台种菜嘅相,今次仲曝光埋家中多个角落,呢3,000千呎豪宅确系正。
|