许廷铿疑同胡鸿钧友谊不再

etin

许廷铿成为独立歌手后最近推出第一张自资黑胶唱片《2021》，她近日接受访问时，透露专辑原定喺上年推出，但最后因技术问题而延到今年先面世，佢认为咁样就啱啱好以倒叙形式回顾上年发生嘅事情，佢形容新歌《煽风点火》系2021年各种不安嘅源头。而问到首歌包含着2021年乜嘢嘅不安？佢直言有谂过唔再音乐：“我嘅不安来自我有好多嘢都唔识，有好多情况上嘅混乱，令我好唔肯定自己系咪可以以一个自家厂牌出到专辑。二嚟亦受疫情影响，除此之外人与人之间少见面，产生误会嘅机会都高好多。确实我身边有啲关系起咗变化，以为原本觉得做到一世朋友嘅人，当你唔系日日见，就发现冇你想像中咁巩固。”

​佢话过往一啲喺工作上认识嘅同事，原来关系只系限于做同事而唔系朋友：“呢段关系好残忍，有啲同事你成日见，你觉得系好认识佢，但系当唔需要见嘅时候，你同佢唔会有好多共同话题。原来系因为大家一齐日日相处，可能叫做喺同一个环境下共事，觉得大家好熟，做嘢好有默契。当疫情大家要喺自己屋企嘅时候，发现我真系想搵嗰个，未必系日日见嗰个。有啲人反而系唔需要日日见，但系嗰啲时候会好想同佢倾偈。所以疫情之下，某程度上得到嘅多过失去嘅，虽然有啲以为好稳固嘅关系失去咗，但同时亦都搵到边啲先系我好想去好好经营同巩固嘅关系。”众所周知，佢曾经同胡鸿钧系“密友”，但之后又传出不和，仲话佢哋好少再联络添，唔通佢呢番话系意有所指佢哋友情不再呢？