欣宜自爆有好多人追 唔舍得买珠宝要等人送

etin

艺人郑欣宜昨日（16日）性感打扮出席公开活动，更戴上逾千万首饰上身。她坦言自己有“悭妹性格”，所以不舍得买昂贵饰品，问到会否叫男友送，她说：“我真系冇收过珠宝，不过你哋唔好讲到好似我得一个人追咁啦，有人送嘢系开心嘅。我唔舍得买嘢，但舍得食，虽然演唱会我要节食，但啲两日放假，我去咗食鸡蛋仔同格仔饼，真系好耐冇食过。”问到妈妈是否有很多珠宝留给她，她说：“有啲啦，我想一代传一代。妈咪有对耳环、婆婆有只戒指，平时我都唔系好舍得戴，都系收藏多。”谈到演唱会彩排，她说：“我发觉自己冇乜方向感，嚟睇嘅观众记得嗌我返嚟呀。最近返屋企冲凉会发现瘀咗，应该系练习整亲而自己唔知道。（有冇请爸爸郑少秋嚟睇？ ）叫咗好多身边人，当然包括爸爸在内，不过大家都好有爱，预售时发现佢哋已买咗好多飞，几小时内售罄，希望开售嘅时候成绩继续理想。”

魏浚笙希望早婚

同场还有魏浚笙（Jeffrey）及卢慧敏（Amy），Jeffrey被问到投资保值时即腼覥说：“其实呢方面我乜都唔识，所以净系储钱。（贬值喎。）我惊我投资仲贬值得犀利呀。”一向扬言希望早婚的他，打趣指老婆本仍“十画未有一撇”：“买楼更加遥远。（叫女友揸数系咪好啲？）佢都唔叻。”谈到“执二滩”拍摄剧集《百万同居计划》，Jeffrey继续表示不介意，且开心表示：“寻日（15日）拍咗场戏好搞笑，讲我同只狗狗演对手戏。剧情安排佢要吠，点知落大雨佢死都唔出声，最后要工作人员扮狗吠凼佢，点知同真狗吠声一样，狗狗终于吠嘞。”

孭“演唱会飞债”

身为陈卓贤（Ian）女友的Amy，被问到是否“演唱会飞债”缠身，她说：“都有嘅，尽量帮手。（你有亲友要飞？）我谂要后一批。”与吕爵安（Edan）老友鬼鬼的Jeffrey亦插口：“我阿爸都有问我，我叫佢自己揿飞啦。”至于Amy早前于拍摄时伤及左眼，目前大致上已痊愈，她更搞笑说：“好彩我黑眼圈深，瘀咗都遮得到，其实嗰场戏系讲我挟持住个人质。（觉得自己身手好？）就系唔系啰，我觉得自己手脚唔协调，毕竟拍动作戏都系一种学问嚟。”