徐荣自爆曾眼红林峯上位快：嗰时我觉得我靓仔过佢

etin

无綫第13期艺员训练班嘅一班同学，包括徐荣、林峯、杨茜尧、张美妮、杨明等出名感情好，毕业多年依然不时聚首一堂，早前林峯回巢拍《使徒行者3》时，一班同学更齐齐客串力撑，不过昨日徐荣亮相J2节目《人夫放假约出去滚》，就自爆入行初期曾眼红最快上位嘅林峯，坦言心有不甘：“初初真系有嘅，阿峯好早就上，阿怡（杨茜尧）都做过一排奸夫淫妇呀、师姑呀，后尾先做过礼仪小姐㗎嘛，佢就迟少少，但都上紧嘅。初初个感觉系咁样嘅，因为同期训练班一定会比较，讲真唔比就呃人㗎啦，我成日谂‘阿峯做啲戏，我都做到吖，唔差㗎喎应该做得’，会有呢啲谂法。”

佢续指当时比较自负，认为自己靓仔过林峯：“读训练班嗰阵时好自负㗎嘛，我觉得我拍得住金城武嗰啲嚟㗎，自己睇自己特别靓㗎！”并指花咗4、5年时间先调节好心态，虽然曾经谂过离巢向外闯，但离开又觉得唔甘心，终决定留低，现时虽然仍演配角为主，但佢就认为胜在角色有发挥空间，自己亦会花心思喺造型上，希望观众见到不一样嘅佢：“一年可能有两至三套剧系有你出现，如果你个外形都唔变呢，我都想观众睇到有啲唔同，咁对自己有个交代。”至于讲到奖项，佢坦言曾有失意，但现时已经看淡，得奖与否并唔系自己能够控制。