新突破！李施嬅为《金宵2》献声 亲自创作做才女

etin

由艺人陈山聪、李施嬅主演嘅无綫新剧《金宵大厦2》将于下月4日播出，剧集首辑大受欢迎，更于台庆颁奖礼斩获“最佳女配角”、“最受欢迎电视女角色”及“最受欢迎电视拍档”多个奖项，新一辑自然备受瞩目，而今次回巢拍摄续集，李施嬅亦有新突破，原来佢有份献唱剧集插曲《相爱万年》，歌曲更系由佢亲自参与创作，令人相当期待，佢喺社交网宣布出歌消息：“第一次唱作。第一次自己个人嘅歌。期待一下。”拍档陈山聪即留言支持：“期待期待。”其实李施嬅曾与海俊杰推出合唱歌《二次缘》小试牛刀，今次再出个人单曲甚至参与创作，大骚音乐才华！

​施嬅昨日接受访问，她指新歌由她与表妹联手创作：“系为咗《金宵大厦2》而作，但当时冇谂过真系会用得到，咁啱监制话要为套剧搵歌，佢喺机缘巧合下听咗我首歌觉得合适，于是用咗。好开心，系上天安排，我负责作曲，由林若宁作词，作词都系要交畀大师级，佢写到我想要嘅画面，首歌会喺下星期一正式推出。”她坦言出道时曾写歌，但一直无人问津，亦无唱歌机会，直至前年跟海俊杰合唱：“当时同一间唱片公司合作咗一次，佢哋想再合作，叫我写歌，我写嘅时候唔知可以用到喺套剧入面，好感激唱片公司老板咁支持同信任我，始终我唔系歌手，系佢畀胆我去唱同作歌。”