许廷铿认做《造星》导师偏心：真系好难公平！

etin

歌手许廷铿（Alfred）昨日（29日）出席活动，受访时笑谓最近话题全是围绕住ViuTV真人骚选秀节目《全民造星IV》，来到由60强Foul至40强的关键时刻：“Foul人嗰阵内心都好挣扎，真系好难公平、公正同公开，始终都系会有少少偏心。”对于有网民指节目是《全民造假》，Alfred笑言：“边有咁多造假？但有好多参赛者开始感受到啲舆论压力，听到唔同批判嘅声音，最后归功于节目，多人留意先有多啲嘅声音。”

另一导师梁祖尧亦曾Post千字文表示受被质疑裁决的压力，Alfred坦言都有，现换转成观众再收睇节目，的而且确有“睇漏眼”情况：“当下只系睇住个细Mon、唔喺表演现场又睇唔到佢哋背后嘅花絮故事，阿妹真心觉得走漏眼，觉得佢几靓。（Foul错边个？）我哋冇Foul人权利，只系冇捞番，阿妹系其中一个，同埋有个叫Yanis，节目冇剪过出嚟，其实我系有向大家提议过复唔复活入60强，但位就真系得咁多，呢两个都系网民力推。”他又点名大赞刚被Foul走的Emiko是“潜力股”，自责指作为导师都未能发挥责任帮对方，最后只能眼白白见她离开节目，之后或会再搵方法延续其星途。

​Alfred笑说为节目豁出去，曾连踩29个钟开工：“正常嚟讲我系唔得，我要瞓系冇嘢阻止到，嗰日系用番我整牙、读牙科嘅力去应付，哈哈！”并搞笑话可能观众晚晚都见到自己，形象变得亲民成“全民导师”，甚至有Fans利用倒后镜跟他自拍！

另外，讲到胡鸿钧近日开处男骚大晒肌肉，Alfred指没有入场亦冇睇到相：“最近睇女仔真系睇到好密！（咁要睇吓啲男仔。）真系冇睇到啲相。（你又操到咁啦！）呢几年我‘收’身齐家治国平天下，尽力‘收’身啦！哈哈！”