《星》剧BB道具造价达5位数 锺嘉欣晒演技网友力推视后

etin

无綫台庆剧《星空下的仁医》进入结局篇，剧情愈来愈刺激，日前一集大肚锺嘉欣突然下体出血，要做手术拎个BB Heman出嚟，可惜确诊感染病毒，所以个BB救唔番，而手术期间锺嘉欣一度心跳停顿，最终成功抢救，而郑嘉颖更要为锺嘉欣做手术取出死胎，由剖腹至取出连住脐带的BB，过程冇打格非常逼真。据知BB道具造价达5位数，而且是跟足真实情况订制，无綫今次落重本！

而锺嘉欣手术后苏醒，见不到儿子Heman，最终郑嘉颖告知其儿子已离世，此时锺嘉欣演技达到高峰，喊住话：“对唔住呀！妈妈害死你呀！”观众看到心都酸。而郑嘉颖就揽上身，指是自己失误害死Heman，但之后锺嘉欣与他真情对话，承认自己有幻觉，并表示是时候要放下：“我知道BB已经走咗，我知道我唔应该再见佢，但我真系好唔舍得佢，我唔想自己咁清醒，佢之前仲喺我个肚入面，我连同佢Say声Sorry都冇机会。我好挂住佢，好挂住BB呀！”

而昨日（16日）锺嘉欣在社交网上载一张抱B相：“Heman: I will love you forever and ever. ”而网民就在贴文下留言，力推锺嘉欣做视后：“你演得好好，好入戏！今年视后如果唔系你就真系天理难容”、“嘉欣你做得非常之好，睇完我个心实埋，Support u。”

锺嘉欣接受访问时说：“我一直嘅拍摄都以剧情、角色行先，演‘章以芯’呢个角色嘅时候，已经投入晒喺呢个女仔度，我真系想像同相信自己经历紧呢个过程，所以拍嘅时候，好辛苦，情绪好低落，知道自己BB有事，冇健康地出世嗰种痛...记得我拍前，培养情绪，身体都会感觉好唔舒服，演完之后，成个身震晒，完全投入，连身体都好似经历紧呢个创伤，好伤心。”

她还指演这部剧时，画到剧本花晒：“因为已经做咗妈妈，个剧本写完出嚟已经好靓，但我都会加添小小嘢，同埋，我本身好喜欢呢个角色，希望做到呢个角色个一道光带出，呢个女仔好有正能量同使命感，事事为病人设想，系一个好简单嘅女仔，上天赐予佢有超于常人嘅能力去做手术医人，佢亦好好擅用呢个Super Power。”

观众如此喜欢她的演绎，睇得甚为投入，会否令她对视后奖项增添信心？她谓：“好多谢观众咁支持我，好感动，之前嘅辛苦、心机都冇白费，作为演员，知道观众睇得投入系最开心嘅，奖项嘅嘢随缘，有奖就好开心，冇奖都唔紧要，喺呢个拍摄过程我学咗同试咗好多嘢，真系好感谢大家，未睇完整部戏都咁支持同睇好我，已经赢咗。”

​