林夏薇有信心拎视后 冯盈盈打定输数！

etin

艺人林夏薇（薇薇）及冯盈盈（盈盈）昨日（2日）录影无綫综艺节目《男神厨房》。薇薇tube top上阵，而盈盈则早已换成冬装，二人站在一起相映成趣。盈盈笑说：“有人提醒我录影厂好冻，但今日嘅菜式以辣为主题，真系食到周身汗，而且我哋两个都唔食得辣。”

问到二人厨技，薇薇冧爆表示：“我屋企有男神私房菜，我老公好锺意煮嘢食，又会研究新菜式，咁啱呢排我未开剧，可以增进感情。（你自己煮嘢食叻唔叻？ ）我有跟老公学，最捻手系杏仁炒鸡丁，因为老公锺意食。呢味餸令我知道煮嘢食控制时间好紧要，会影响肉类嘅鲜嫩。”

她又搞笑透露盈盈将菜名听错为“杏仁炒鸡精”，盈盈腼腆谓：“头先佢哋介绍我出场，竟然系话题性博士，所以标点符号位置真系好紧要。”读营养学出身的她，则表示有跟爸爸学炒滑蛋， 以往拍拖下厨，菜式以颜色取胜：“用唔同嘅食材即系营养均衡嘛。”

另外，薇薇被问到今年提名视后的信心时，她坦言：“锺嘉欣同黄智雯都表现好好，观众嘅肯定同鼓励先系最紧要，角色有讨论度已经好满足。（边个系劲敌？）个个都系，每位都有我值得学习嘅地方，但信心我一定要有，尤其《七公主》系我入行以嚟身心最大嘅挑战，不过《逆天奇案》就换嚟国民女友嘅称号。（咁想粉丝投边套多啲？）《七公主》啦，真系从来未做过呢啲角色。”盈盈闻言笑指自己亦凭《逆》剧换来“国民妖精”称号：“我亦有份演《智能爱人》，但同呢两套剧分别嘅女主李佳芯及薇薇比较，我一早已认输啦。”