方中信突然示爱 莫可欣惊呼毛管戙

etin

所谓“无怨不成夫妻”，影帝方中信与太太莫可欣相处20多年来，关系曾出现不少“沙石”。方中信的硬汉形象深入民心，外界认为可欣处于“下靶位”，早前她受访时就抛出一句“下世做番普通朋友”，令外界猜测双方关系危危乎，不过他们对这段婚姻抱有信心，方中信更突然发表爱的宣言，搞到可欣大叫毛管戙！

方中信近日接受专访，提到可欣早前公开谈及婚姻关系时指夫妻不时有摩擦，希望下辈子只做朋友，他即表示自己拥有幸福家庭，婚姻生活美满，绝不担心婚变，向来硬朗的他更突然示爱：“为咗我嘅家庭，尤其系太太，依家我每日都抽15分钟出嚟诵经。（点解可欣咁迁就你？）佢爱我啰！咁同样地我都真系好爱佢，记得话畀老婆知我咁样讲，哈哈！夫妻间相处，互相迁就系恒常之道。”

疫情下多陪家人

他指疫情下为了照顾家中3位“女王”：太太、囡囡及年迈母亲，他选择留港，：“真系想陪吓屋企人，坦白讲，我都唔系咁想隔离太长时间。（想睇实青春期嘅囡囡？）本来想送佢出去读书，依家咁嘅大环境就睇定啲先。（暂时未有新工作？）依家香港开戏较少，演员更加被动，好似我拍完《扫毒3天大地大》就坐咗成个月，最新动向系忙跑山做运动，有工作倾紧都要畀啲时间等成事。”

至于可欣最近被重提当年大肚逼老公“就范”结婚的传闻，情商高的她全程表现豁达，只简单澄清与事实不符。提到外界担心其婚姻状况，她昨日接受电话访问时大派定心丸：“有边对夫妇完全冇冲突摩擦吖？要学识互相包容体谅，我都好有信心呢世唔会离婚！自从生咗个女开始，我同老公一样每日诵经，佛偈真系帮到我好多，好多嘢唔再执着，保持平常心。我好欣赏老公嘅优点，例如佢好顾家、唔会拈花惹草，同埋佢嘅黑色幽默有时几好笑。同佢相处唔使太认真，因为认真你便输了！”

叫老婆养活自己

记者转述方中信“爱的宣言”，可欣沉默了几秒才说：“哗，好Surprise！佢返嚟真系冇同我讲过（专访内容），况且口甜舌滑完全唔系佢嘅性格，冇谂过出自佢把口，感动到毛管戙！”并透露近日老公“赋闲在家”，二人倾密偈时，对方曾打趣叫从事“鬼口水”生意的她养活自己，她表示：“托赖我嘅生意唔错，计划紧开分店，但如果佢要继续玩‘玩具’，我点养得佢起呀？坦白讲，佢都开始归于平淡，大概一年前我哋见唔系成日出海，终于卖咗只游艇，我谂佢心入面系唔舍得嘅，但冇出过声。”