何雁诗做肥新娘传双喜临门 郑俊弘恨生B

etin

本月7日系歌手何雁诗（Stephanie）跟郑俊弘（Fred）结婚周年纪念，两人亦拣选呢日补摆喜酒，近日盛传佢哋“双喜临门”，Fred被问到太太系咪有喜？佢笑谓：“我哋冇呀，未有双喜临门，希望将来会有。”而Stephanie笑说：“其实又唔系个个结咗婚嘅女人肥咗都系有咗嘅。”虽然佢喺社交网笑言要做一个又chill又fat嘅新娘，但因为早前由美国返港，酒店隔离21日食大咗个胃。

谈到生B大计，Stephanie坦言随缘，并否认有喜：“冇咁嘅事，我都唔知点解突然之间有咁嘅传闻。上年减咗之后，我都未肥番晒嘅，香港人结婚好多嘢搞，好大压力，唔想特别增添一样烦恼，我唔觉得一定要好瘦、好瘦先系最靓嘅。我依家都系正常体重，又唔使特登减到比BMI过轻，我觉得健健康康、开开心心就OK。”结婚周年可会互送礼物？佢笑言：“Fred喺我隔离大声咁讲冇呀！因为结婚前后又系我哋两个生日，我哋本身都唔系好送礼物。”

佢又透露婚宴邀请400位宾客左右，应该唔到40围，婚宴会分几区，婚纱方面已挑选好：“本身谂住拣两套，唔使换嚟换去，点知爸爸妈妈同奶奶好期待呢个婚宴，拣咗好几套衫，想我配合番。”并透露邀请无綫《流行经典50年》队Band到婚宴场地，因为届时有表演环节，除咗朋友会上台唱歌，佢同Fred都会每人唱一首：“预计去到尾段大家饮得尽兴时，随时走上台唱都得嘅，队Band好多歌都熟悉。”