胡鸿钧港铁被偷拍 车厢“开骚”放声高歌

etin

歌手胡鸿钧（Hubert）喺社交网站自爆被人偷影！事缘佢收到朋友Message指见到个熟口熟面、好似佢嘅人喺港铁车厢唱歌，Hubert承认系自己之后，仲大方转载“偷拍片”自嘲样衰，留言讲反话赞耳机隔音一流︰“我以后都唔敢啦！呢一刻好想搵个窿捐！”片段中见Hubert戴住深色Cap帽，头挨玻璃兼手拎住部电话，一脸陶醉咁高歌新加坡歌王林俊杰首名曲《修炼爱情》，简直好似喺港铁开紧骚咁，为嚟紧演唱会做热身，唱到兴起嘅时候仲不自觉合埋眼又印印脚添！“完骚”之后见Hubert变回普通市民孭番个背囊，手插住袋咁离开车厢。

个Post一出吸引有好多圈中朋友留言，吴若希打咗几个笑喊Emoji话“好好笑呀喂！”、何雁诗笑问佢“做咩嘢？”、而钊峰同王君馨就给予鼓励“呢啲咪专业啰，边度都系舞台！”、“地铁车厢系创意之地，我以前成日都系搭地铁喺脑入边排舞！”亦有Fans支持话：“咁好听就唔怕啦，再大声啲都仲得！”、“果然系实力派歌手”、“系咪播紧歌咋？咁好听嘅！”，大赞偶像系“行走CD”！