艺人周家怡出席ViuTV剧集《反起跑线联盟》开镜拜神,双膝贴上纱布的她右手又擦伤,坦言早几日跑步跌伤:“嗰日打风收工,因为第二日节目巡礼,谂住跑步先出活动,点知天雨路滑仆低,只手又擦伤,脚黐咗纱布先好啲,之前又肿又痛。”她又笑言当日8号风球周围都冇得卖生理盐水:“我惟有用酒精消毒,朋友笑我系军人,真系乸到反眼架。”她又庆幸受伤没有影响工作。
而讲到她拍无綫剧集《星空下的仁医》,现又拍ViuTV剧集,食两家茶礼,她即笑言:“系咁啱啫,因为TVB嗰套系《导火新闻线》嘅编剧,好耐冇合作,而今次呢套我都好期待。”她又透露今次饰演妈妈角色,大赞剧中小朋友很聪明,又笑5岁的囝囝似“朝伟”:“我哋剧中啲小朋友有朝伟、家辉、青云,我个仔演绎好内敛,嗰次佢要扮急尿,我哋叫佢夹住只脚,佢就话唔使啦,企喺度就得啦,佢觉得唔需要唔浮夸,好得意。”问到拍此剧可有令她母性大发,想快些做妈妈? 她笑言:“有母性大发嘅,但唔可以单方面繁殖架嘛。”
|