曾淑雅踩飞鹅山石壆当平衡木 被插教坏细路

etin

曾淑雅（Jumbo）唔只系长腿女神，仲系“山系女神”嘅代表人物，佢不时喺社交网Post行山相，几乎每次都小背心配瑜伽裤示人，真系赏心悦目又缤纷。佢喺社交网又发功，今次去到飞鹅山，不过今次佢件黑色Sports Bra再唔成为焦点，因为佢竟然危站高山石壆当平衡木咁行，睇见都危险。

从Jumbo上载嘅片中显示佢身在飞鹅山，虽然未到山顶，但高度已可饱览九龙同对面海景色，只见佢企喺石壆享受清风送爽，然后回眸向镜头一笑，跟住就当长长石壆系平衡木咁行，然而目测石壆唔够一呎阔，Jumbo行行吓都要展开双手以作平衡，佢最后更将镜头pan落石壆下面，见到一堆草丛同万丈深渊，睇见个心都离一离。

飞鹅山不时意外频生，今年3月，一名退休保险经纪独行飞鹅山“自杀崖”失踪，翌日由直升机救起送院不治，每年都有大大小小意外发生，网民见到Jumbo危站石壆都话惊惊，有人留言：“唔识死！”、“小心啲呀，下次唔好咁呀！”有人更留言话Jumbo咁样好易教坏细路，随时有样学样。