无綫小花刘佩玥(Moon)拍紧新剧《隐形战队》,日前佢同江美仪、唐诗咏、刘颖镟做访问嘅时候,被江美仪爆料开工睇咸片,吓到佢要即刻澄清!事隔几日Moon骚腿出席热播剧《把关者们》宣传活动时,受访期间再提起呢件事,记者笑话佢被爆私隐,Moon抵死笑讲︰“摆明系明屈!哈哈!咁系因为我份人玩得,大家都锺意开我玩笑啫!咁呢件事又的确系搞笑嘅!”问到佢嗰阵睇紧咩片?佢就话只系普通搞笑片,仲笑话对有咸片广告弹出嚟已经系见怪不怪︰“成日睇片都会弹出嚟,自己冇乜所谓,因为又唔会专登揿入去睇。(佢哋有冇再拎呢样嘢同你讲笑?)又冇,纯粹系嗰阵大家想搞吓笑,大家拍剧相处得太融洽,感情好好就唔会太介意。”
反而Moon系担心访问片出街后会被妈咪“拷问”训示,点知妈咪睇得好通透,甚至觉得对方好搞笑,Moon话︰“佢问我:‘点解美仪姐咁得意?佢真系好好,做访问嘅时候专登抛个波畀你,真系好提携后辈!’”另外,Moon又大赞江美仪拍剧时好专业、演技好好︰“真系好欣赏佢,剧入面佢做我嘅上司,有好多对白要讲,而佢本身唔系一个咁恶嘅人,但佢出到嚟个感觉系好严肃,之后发现佢同我一样都系9月生日,果然9月生日嘅人真系好叻!哈哈!”
|