戴祖仪睇中涂毓麟教自己小朋友：5岁要8级钢琴

etin

歌手戴祖仪（Joey）同涂毓麟（Oscar）因为合唱《我们再不讲再见》而成为新一代萤幕情侣，佢哋亦食住个势预告嚟紧可能喺音乐上有更多嘅合作，除此之外，谂头多多嘅Joey仲提议可以开套电视剧，剧中大谈姊弟恋，打趣问到佢系咪对Oscar有兴趣先有呢个Idea？佢抵死笑话︰“拍出嚟都未必系真嘛！真嘅都喺私底下啦，哈哈！”再话自己未曾试过姊弟恋，一向都系锺情哥哥同叔叔，因为希望另一半有成熟稳重嘅感觉，不过佢都冇将说话讲死，打底话未试过又唔代表冇可能发生︰“最多可以接受到细3岁，倾到偈、开心就系最紧要，年纪呢啲嘢真系好浮云。”而Oscar都话可接受姊弟恋︰“之前拍拖系学生年纪，加一（岁）减一（岁）咁，咩差距都可能发生。”

另外，讲到Oscar终于毕业成Full Time歌手，仲即刻接到无綫节目《劲歌金曲》嘅主持工作，佢亦都系话一个好嘅正式开始。Joey指对方音乐造诣高，唔需担心搵唔到食︰“9岁就钢琴演奏级，咩事呀？我都唔知自己9岁做紧咩！哈哈！”Oscar接话依家啲小朋友好叻，最近识咗个5岁就考到8级嘅小朋友︰“所以我日日都话我表妹‘你睇人哋5岁8级，你5岁琴都唔识弹！’（你会系严父？）我好肯定如果我有小朋友，我系会超级严，一定要学钢琴，觉得音乐好重要，音乐系一个途径去抒发，连我妈都叫我唔好Chur到表妹咁，我话‘唔得呀！6岁冇8级，人生失败㗎啦！’，我真系对我自己care嘅人要求好高，既然有机会做到嘅时候点解唔做好啲呢？我相信考8级系勤力就做到，唔关天分事。”

相反，Joey就轻松话如果佢有小朋友，已经准备好个List同佢哋做︰“喂食苦瓜、柠檬、辣椒，想睇吓佢哋个样会点！”再灵机一触对Oscar笑话︰“我觉得你好适合做老师，如果我有小朋友，一定会畀你教！如果佢5岁冇8级，就你垃圾！你人生就玩完啦！”此话一出笑翻全场！