否认挞着菊梓乔 吴卓羲：Tag完系咪要结婚？

etin

​艺人吴卓羲（Ron）前日（10日）凌晨于社交网Tag了一个空白Post给歌手菊梓乔，惹来公开恋情之嫌，接着整日潜水的他，昨午（11日）出席好友梁竞徽钟表店开幕剪彩活动时，自然成为全场焦点，不过当在场传媒问到是否要恭喜他，Ron却反问：“点解要恭喜？”更娓娓道来事件由来，澄清只是一场误会，并否认拍拖。

问到为何要凌晨4点出Post？他说：“因为我开紧工，未瞓觉。（点解净系tag佢？）其实我识咗佢好耐，都唔记得咗加佢微博，以为tag咗就系add咗佢。（系咪菊梓乔攞你电话add？）都话我自己add。（网民估今次系你旧爱张馨予翻版？）谂多咗，唔知tag一tag网民咁大反应，因为识咗佢好几年，同邓智伟有共同朋友，咁我开开吓工睇到微博，见到佢就add佢，整完要通知佢，唔好谂太多。（引嚟好多揣测！）我都有睇，谂住今日见大家一次过澄清。”

问到对菊梓乔可有好感？Ron表示：“佢唱歌好听，希望嚟紧可以合作。（锺唔锺意呢类型女仔？）唔讲呢啲，仲拣紧，工作冇咩时间，冇谂过tag佢会发生咁多猜测，咩2.0我觉得好好笑。（传你哋前后脚去大埔某百货行街？）我自己有去，平时经常性自己去呢个超市。（有冇发展空间？）唔讲呢啲，由人哋谂我控制唔到。（依家单身？）感情嘢唔讲，专心工作，平时唔系好搞社交网。（学习？）我手指又大惊整错，以为tag话佢知，唔知有咁嘅误会。（同佢沟通呢件事？）一齐睇到成件事，有讲吓，冇乜嘢。（佢好失望？）系一场误会，冇啦，tag就系拣咗咩，咁tag完咪要结婚？”

对于绯闻男友Ron拒认爱，菊梓乔表现相当配合，她受访时表示：“佢都话感情事唔讲，我都唔讲啦，大家都专注工作，睇到佢嘅访问仲话拣紧（女友），咁快啲帮佢澄清啦。”讲到Ron有赞她唱歌好听，希望未来大家有机会合作，菊梓乔即称Ron是前辈：“佢欣赏我，我系开心嘅，但系咪真系有机会合作就要问番佢啦。”至于可有跟Ron拍拖？她说：“如果我系佢女朋友，佢就唔会话拣紧啦，多谢大家关心，我哋都估唔到外界有咁大反应。”不过她承认有追求者，现在考虑阶段中。问到是否包括Ron在内？她表示：“哈哈，大家唔好咁多猜测啦！（如Ron追求，可考虑？）大家谂多咗啦。”