黄宗泽为凼Fans玩歇后语 网友错Fo话佢太密实

etin

最近忙紧同视后蔡思贝赶拍新剧《廉政狙击》嘅艺人黄宗泽（Bosco），就算开工几咁忙，都唔会冷落佢班粉丝。疑似着住戏服嘅佢，趁有少少时间就同粉丝玩“歇后语大挑战”，嗰几条问题唔算难，不过一向精灵嘅佢，竟然畀只“了哥”考起，佢唔识答嗰个表情真系好Cutie啰。

一开始，一脸自信嘅佢，就被问“风吹鸡蛋壳”下一句系，佢谂都唔谂就答：“财散人安乐”答中咗时，佢个样咁好鬼得戚，再被问：“黄皮树了哥…”，佢即失威被考起，先“唔”一声，再乱答：“食橙无鼻哥”，以为押韵就可以过骨，真系写个服字畀佢。衰咗一条唔紧要，再问到比较难啲嘅“潮洲佬拉二胡”，佢好醒咁仲用潮州话答“（格叽顾格叽）自己顾自己”，至于“神仙放屁”，佢即答“非同凡响”，到“阎罗王探病”，佢都答中埋系“问你死未”。

啲粉丝就留言话“黄皮树了哥”歇后语系“唔识唔食”呀，不过Bosco其实答中几多条问题都唔重要，原来啲粉丝最关心佢点解着到咁密实，有人留言写：“黄皮树了哥，宗泽穿得多”，唔怪得知啲艺人咁勤力操身，要满意粉丝，无论男女都要除衫骚Body。