张致恒着名牌褛被网民寸：有钱买贵衫冇钱还畀人

etin

欠人一身街数嘅艺人张致恒（Steven），为兑现早日还钱嘅口头承诺，近年一有机会就会返内地搵银。日前有内地网红甫咗佢同曾经参演周星驰电影《破坏之王》，扮演“奔雷手”嘅绿叶演员郑家生，喺内地酒店准备开工嘅视频。

见着晒西装嘅郑家生企喺酒店大堂，等紧讲住电话嘅Steven，之后就一齐同个网红趁未开工前先去食晚餐，3个麻甩佬食得好简单，枱上得一碟茶、一碗汤同一盘生果，不过唔知Steven系咪知道自己肥到现双下巴，定系啲饭菜唔系咁啱佢食，所以都系斋睇唔食，坐定定、笑笑口陪住同枱两位仁兄开餐。

啲网民留意到Steven着住嗰件牛仔褛系日本名牌货，喺网上卖成近4千蚊，即留言寸有钱买贵衫，但冇钱还畀人，更有人提醒网红要小心被问借钱，因为大有可能一借冇回头。讲开佢呢件牛仔褛，斋睇相就唔知“真嘢”定“A货”，但系一定唔系新买，因为之前佢同关智斌去登台嗰阵着过嚟影相，其实佢呢次去登台都系着旧衫已算叫知悭识俭，依家肯开工，唔再系好似条蛇咁摊喺屋企，个人都算有进步㗎啦，况且人谁无过，网民又何必讲嘢咁Mean呢？