姊弟档行骚 陈凯琳“投诉”细佬抢位企

etin

艺人陈凯琳（Grace）昨日（2日）首次孖胞弟陈浩彰（Derek）出席公开活动，前者配合内衣主题身穿透视装露黑色Bra，更轻露事业线，健康性感！受访时问到Derek出席“处男”骚可会紧张？他直言有少少，全程跟住家姐企位及做动作，岂料Grace“投诉”：“我哋两个都系左边面靓，佢一出到嚟就企咗左边，所以依家做访问我企左边，哈哈！”

问到酬劳是否好可观才出动细佬？Grace笑住否认，解释是因为跟品牌合作了一段长时间，关系密切：“咁啱佢哋话有男装，咁屋企有好多人选，但2个囝囝仲细、老公（郑嘉颖）又要开工，就叫咗细佬。”Derek搞笑问家姐：“即系我系第4个Option？”Grace爆笑一声之后想补镬之际，Derek笑话：“唔紧要！我内心会谂我永远都系你第一个选择。”Grace即大赞细佬：“竟然系你帮我兜番，哈哈！（下次搵爸爸出活动？第5个Option？）都可以谂吓！哈哈！但佢怕丑啲。”

再问到之后可会考虑继续以姊弟档接Job？Grace直言弟弟已经常出现于她的社交平台，若有剧集、广告邀请会接？Derek笑谓：“如果剧本系全英文都OK。（叫家姐翻译。）佢中文好过我，佢做呢行畀咗好多心机学中文。”Grace转数快笑说：“咁我哋明珠台见！如果两个仔之后读传统本地学校，啲中文可能好过我，依家我都只系可以5成，而我哋亦有计划帮大仔由国际幼稚园转去传统本地幼稚园，想佢学好中文。（怕唔怕转传统学校佢难适应？）唔紧要，小朋友适应力好强。”