全身湿晒“大解放”！连诗雅做大喊包仲要变“浮尸”

etin

歌手连诗雅（Shiga）近日绝少喺萤幕前亮相，皆因佢开行Turbo赶拍无綫新剧《旁观者》，为免变成“失踪人口”，连日嚟佢都有喺限时动态出Post晒拍摄进度，又以剧中角色“张柏妍”留言︰“成日都要喊，搞到个人都好emo（情绪化）…”下一个Post就见佢喺大热天时，成29度着住长衫、长裙，手拎高踭鞋同袋，一脸狰狞样咁赤脚喺条街度丧跑，不过见剧组对Shiga好好，怕佢对脚热到变“烧猪脚”，贴心帮佢造咗一对隐形“鞋垫”，用嚟呵护住佢对脚板，但要喺高温之下来回跑步畀反应，都咪话唔辛苦！

唔好以为咁已经系极限，Shiga为呢套新剧真系吃尽苦头，之后佢再自爆拍咗场湿身落水戏，要边浸水又要边喊，同剧演员罗天宇负责做摄记将呢幕记录落嚟，一嚟就见豆豉咁细粒嘅Shiga企喺海中央，水位大约去到佢嘅膝头，隔住个Mon离远都睇到佢已经全身湿晒，状甚狼狈，但Shiga好敬业，一听到导演嗌Action，谂都冇谂就向后瞓落水，最后变成“浮尸”咁飘浮喺水面，最后留言︰“今日又拍浸水又拍喊，心情好解放！”