郑欣宜录音录到喊 恨遇真爱生儿育女

etin

歌手郑欣宜（Joyce）经常拍Vlog分享日常生活，日前佢带大家一齐去Studio录新歌，就可以更了解佢嘅平时录音嘅情况，点知出师不利！一去到录音室发现部冷气机坏咗，开风扇又会有杂声，就惟有焗住桑拿咁录音，出名怕热嘅Joyce唔使一阵已经汗流浃背，认真夸张！

而录录吓音又有突发情况发生，就系佢突然叫停爆喊，原来系因为首新歌歌意刺中佢嘅“要害”：“因为呢首歌真系我依家经历紧嘅嘢。”之后佢仲发现之前喺呢个录音室录其他有Meaningful嘅歌《女神》、《小夜灯》同《你是什么时候开始不爱我的？》都系录到爆喊收场，有住特别嘅“缘分”。

​

镜头一转见Joyce开餐医肚，主动提起新歌歌意系“我一个人，但我并不孤单”：“首歌系非常之赤裸、非常之要挖开我个心，去说出我心底话。”再坦言依家系单身，自爆自18岁开始拍拖以嚟，每结束一段关系都Keep住好快再有个伴：“好惊自己一个人，当初选择嚟香港系冇朋友、家人，所以有个男朋友陪自己会好啲，呢次我学懂点样欣赏单身。”

一爆再爆，Joyce指对上一次维持单身嘅时间耐啲，有4年：“超唔开心，因为单身超唔开心，直头想离开香港，虽然娱乐事业对我好重要，但另一样重要嘅嘢系希望有日搵到啱嘅对象，去生小朋友，因为好想拥有自己一个家庭，成日生日许愿都希望有个好伴侣，但自从旧年年头同上一个男朋友分手后，开始改咗少少角度，希望自己幸福快乐，做个Happy Girl。”