薛凯琪腹痛急入院 60个钟冇食嘢医生逼去便便

etin

歌手薛凯琪（Fiona）日前晒出同天后容祖儿及王祖蓝等好友庆祝其40岁生日嘅合照，画面见佢又Cake又酒相当尽庆，点知一日后，佢就自爆右下腹位置剧痛足成晚，最后决定入院检查，医生为佢吊止痛药及做电脑扫瞄，发现原来系肠炎：“报告出咗唔使割盲肠，痛咗大约13个钟，肠某个部位发炎，所以要留院观察，吊盐水同其他药。我12号8点后已经无食过嘢，医生话一直唔可以食嘢同饮水，一直吊盐水睇下会唔会自己好，如果好得较慢会喺鼻插管落肠嘅位置，将入面嘅气同水抽出嚟。”

至昨早（14日），Fiona表示医生坚持要等佢成功排便后先出得院，但超过两日半未进餐令佢毫无便意，更加令佢压力加大，仲话听医生建议喺病房内多走动，望可以成功排便，如果唔系佢就有可能要做手术。唔少圈中人都Keep住留言撑佢，好似契妈余安安、关智斌、王敏奕、余香凝、张继聪、林家谦等，齐齐集气祝佢早日出院。