港姐揭秘！黄婉恩参选投资5位数 自费买靓衫上堂

etin

艺人黄婉恩（Yancy）旧年参选港姐时进身10强，眨吓眼依家已经选紧新一届，近日佢就喺社交网收集网民对佢上年参选嘅提问，再出片大玩揭秘，佢仲好有心咁戴番个名牌出镜打招呼。其中最多网民问佢嘅，就系“嘟嘟姐嘅全名系乜嘢？”因为Yancy喺旧年决赛嘅快问快答环节，竟然畀呢条问题考起！事隔一年，佢再答番呢条问题︰“全无綫最靓嘅郑裕玲！其实我系应该知嘅，但唔知点解嗰一刻忘记咗。”

网民问到点解想参选香港小姐？Yancy答话由细到大，都一直想参选，仲笑住话唔知个过程会系咁辛苦，因为成个比赛加埋只系得短短一个月嘅时间︰“忙到冇谂到系一个比赛，而每一Part都想做到最好。”至于参选嘅时候有冇唔开心？佢自爆系有，特别系完咗第二次面试之后︰“畀太多压力自己，始终广东话唔系我嘅母语，练到好大压力，觉得自己表演得唔好，后期有请广东话老师，帮我执正，去到大约第5个星期就开始放松心情，同自己讲唔使担心语言嘅问题，最紧要系做自己，享受个比赛。”最后入唔到5强，有冇唔开心？Yancy话宣布嗰刻系有啲惊讶，因为一心好想入5强，仲谂定会讲啲乜︰“谂咗一段说话想同屋企人、太婆讲，后尾我有将段说话放咗上社交网，其实入到Top 10已经好开心，唔会后悔参加香港小姐，呢个经验同回忆，系用钱都买唔到。”

虽然话用钱买唔到呢个经历，但Yancy自爆参选期间都有一定嘅使费︰“其实参加系唔使畀钱，因为无綫会提供饭餐、化妆、衫，不过有啲时候冇赞助就要自己准备服装，着得靓啲就要投资。才艺表演嘅衫要自己买，如果要上堂、搵老师都系自费，相对嚟讲，我嘅使费可能多过其他佳丽少少，一共用咗25,000蚊。”