“一姐”变新人！菊梓乔苦练半分钟喊出嚟

etin

无綫“最受欢迎女歌星”菊梓乔（Hana）喺无綫剧《刑侦日记》度，饰演“小说杀手”之一嘅“海蓝”，虽然佢家阵仲系“星梦一姐”，地位高高在上，不过跳到戏剧组就系新人，所以一个唔算好多戏嘅角色都要争餐死。佢喺电台访问度话：“其实个角色系好辛苦先得番嚟，要同其他女演员争，但唔开名啦，仲要经过重重面试，喺试戏前，我要熟读剧本，又要练喊戏，其实喺冇音乐衬托下，我真系好难喊到嘅，不过我自己喺屋企练到半分钟内喊到出嚟。”佢觉得面试最困难喺不断重复嗰一场戏，仲要喊出唔同嘅层次，真系好大压力。

讲到首次正式拍剧就同两届视帝王浩信做对手戏，佢觉得最辛苦竟然系26cm嘅距离，佢话王浩信好高：“我哋好有距离感，佢视线系望住我头壳顶，我就要望佢下巴，搞到我条颈好攰。”佢仲话王浩信同古巨基一样好锺意唱歌：“佢好好笑，不停咁讲音乐唔系讲做戏，佢讲自己喺外国点学唱歌，学乐理，点唱歌同运气先系好啰，连导演都一齐倾。”似乎王浩信嚟梗想挑战攞“最受欢迎男歌星”喎。