三年抱三好体力︱陈嘉宝宣布佗第3胎：系惊喜

etin

艺人陈嘉宝（Anjaylia）2019年1月为老公黄颂祈诞下大女Hosanna，点知一年后佢突然宣布生咗第二胎B女Eliana，更估唔到嘅系佢今日（25日）再次兴奋公布喜讯，表示正在佗第三胎，连佢自己都话系惊喜！佢喺社交网上载长文及大肚照，并留言：“没想到，才刚刚三十有一，肚子休息没有多久，便又被新生命扎根进驻了…一步一步在大家的爱护和见证下今天已经成为三个小生命的妈妈了…感恩。知福。今后还请继续多多指教。”

Anjay更兴奋同传媒透露已经怀孕5个月，不过就暂时未有透露BB性别：“多谢大家嘅祝福，我又做妈咪喇！第3次，感觉熟识又有啲陌生，依然好惊喜，因为小朋友系一份天父赐嘅礼物，我同先生都有计划嘅，只系冇谂过份礼物咁快又再嚟，好感恩。我同先生嘅屋企都系大家庭，知道小朋友可以一齐成长会好开心。”

Anjay又表示今次怀孕较之前攰，不过幸得丈夫喺身边支持、照顾，佢又大赞老公系个满分丈夫同爸爸：“佢真系好照顾我，分担好多工作，我哋都好chill㗎，唔想有太大压力。”Anjay谓好注重两位家姐会出现争宠嘅心理，不时提醒自己唔好偏心，问佢第三胎后会封肚吗？佢坦言：“3个小朋友家庭已经好大，要对佢哋公平，好好照料同教育佢哋，对我哋都要公平，我同先生都有自己嘅梦想同事业，要一路行落去，未必有心力再应付小生命，个肚点都要封住先喇。”

而佢好姊妹赖慰玲亦似乎一早知道，佢回应东网指：“真系好戥佢一家开心！睇嚟都会愈来愈热闹！我会好好珍惜同佢单独相处的机会！🤣”