生完两个Keep住靓！锺嘉欣全靠自家制蔬果汁

etin

现年37岁嘅女神锺嘉欣，虽然已为两个小朋友之母，但仍保养得宜美貌依然，早前佢就拍片大谈保养心得，但原来要Keep住健康仲有一个秘诀，就系全靠自家制嘅蔬果汁！

昨日佢就分享蔬果汁食谱，佢透露昔日于香港生活、仍活跃于幕前时，身体经常出现小毛病及炎症，但自从婚后定居温哥华并生儿育女后，为咗有强健体魄照顾仔女，故决定注重营养饮食，于是展开新习惯，过去四年每星期都会饮蔬果汁，当中包括用到青苹果、西芹、羽衣甘蓝等多种蔬菜，其中佢提到羽衣甘蓝含丰富钙质及铁质，而且含有叶酸，对孕妇非常有益，至于薄荷叶就可以去除口气，亦有预防癌症嘅功效。

另外，佢又会为仔女炮制苹果橙汁，并从中加入萝卜及西芹，部分更会整成雪条，令小朋友更易接受。不过嘉欣就表示蔬果汁制作需时，而且洗洗切切会令手臂变粗，更自爆因此有主妇手：“我之前好唔锡身，我唔用手套，只手开始变乾，变咗主妇手，但我唔想佢咁早嚟，所以就开始戴手套。”但强调为咗健康所有付出都系值得。