《3日2夜》女神封盘！28岁陈诗欣宣布被求婚成功

etin

现年28岁嘅《3日2夜》女神陈诗欣，与圈外男友陈尔正（Joshua）拍拖近3年感情稳定，不时公开放闪，唔少网民都催佢哋快啲结婚。

昨日女神终于宣布封盘，原来去年11月男友已向佢求婚成功，早已成为准人妻，佢喺社交网上载多张喺沙滩影嘅恩爱合照，透露求婚过程，男友竟然喺每一道餸加咗自己最讨厌食嘅鸡蛋，以表诚意：“在上年的11月，你悉心安排的求婚，过了大半年，我每一次想起也会感动，怎么会有一个傻瓜在求婚当晚的晚餐，每一道餸也加了自己最讨厌吃的鸡蛋，这个难忘的一晚是我人生最美丽的画面。谢谢你这么宠爱我，谢谢你的善良温柔，谢谢你选择了我成为你的另一半，以后我俩手牵手一同成长一同经历，馀生请多多指教。我爱你，陈尔正。”而Joshua亦有晒出甜蜜合照报喜，其中一张系婚照，风格同好姊妹余香凝婚照好似。

陈诗欣回覆表示婚礼暂定年尾举行，不过一切因应政府疫情措施再作打算，仍筹备当中。佢透露求婚当日，男友早已安排摄制队，为二人拍摄纪录片段，随后到餐厅简单食饭，非常低调。提到最感动嘅情节，佢话：“男友之前有讲过如果求婚会食最憎食嘅鸡蛋，但我听完冇记住，所以嗰日求婚知道佢每道餸加咗鸡蛋，我感动到喊！”

陈诗欣话：“我同男友拍拖差唔多3年，我觉得佢个人好善良、好孝顺，对我好好，同埋佢对工作好有热诚、对理想好有坚持，呢5点系我非常欣赏佢。我喺工作上偶然都有迷失嘅时候，好迷惘时见到身边有一个咁坚持嘅人，我团火都会即刻返晒嚟。工作好攰，见到佢都自己都会即刻好有朝气、活力。当我迷失或挫败时亦会即刻搵到个方向。”至于系咪双喜临门，要赶快步伐追上余香凝同邓颖尧生B？佢话：“冇呀！”

​