伊健惊喜现身！蒙嘉慧直播拉筋失手露肚腩仔

etin

艺人蒙嘉慧（Yoyo）自2013年同郑伊健结婚后一直过住幸福生活，今年初获老公打本过百万喺福冈开设房地产公司，主打物业管理及移民等服务。因为疫情关系，早前佢结束咗香港嘅办公室改为网上经营，唔知系咪时间多咗，佢喺网上直播做运动时露出肚腩仔！而成个直播最惊喜嘅地方，就系伊健突然现身，不过佢好似“赌神”咁，只系得个背脊，见佢企喺度睇风景，Yoyo好鬼紧张，遮晒镜头，唔畀伊健入镜。

Yoyo联同拉筋专家K Sir示范唔同动作，期间更做到跪晒地，真系好认真，素颜上阵嘅佢身形明显发福，其中一个动作系揸住条柱拉筋，件衫自然缩起，搞到个肚腩仔走咗出嚟见人，就连佢自己都忍唔住话：“好大个腩呀！大家当冇睇过。”而K Sir搭讪：“大家洗眼！”Yoyo即时扮起脚踢对方，唔少网民睇完佢个肚腩仔后，都留言话佢啲幸福肥出晒嚟。