咩波都识玩！陈晓华外表斯文活力惊人

etin

艺人陈晓华中学时期读女校，当时相当好动，打篮球、排球、就连足球都踢埋，虽然四肢发达，但手脚并不协调。之前趁未开剧，身体又不好，一次过学多样运动，包括滚轴熘冰、网球、跆拳道等，外表斯斯文文却活力惊人。

她接受访问时谓：“入行后我一直未停过工作，之前停工大半年，发现好多缺点，体能都几差，想改善一下，不过练番好个身体嘅同时，喺呢段休息时间我都胀咗唔少，成日食嘢，由上年10月到依家，我足足重咗20磅，真系胀咗好多，依家要靠做运动减磅，我之前真系试过喺Gym房做运动攰到呕，依家每日只会喺8小时内食嘢，已经瘦番10磅，希望尽快回复1年前。”

打网球唔怕晒黑

日前，她就跟教练练习网球，拿起网球拍的她每次击球都相当有力，绝对不容看小，她又认叻说：“读书时期，其实除咗游水之外，我乜都玩，篮球、排球、羽毛球、乒乓波都有，仲有跟阿哥去踢波，之后大学几年要读书，身边又冇乜朋友陪做运动，所以身体差咗好多。”说到打网球很容易晒黑，不少女仔都“怕怕”时，她说：“系呀！好少女仔唔怕晒，我唔怕，因为自己系易黑易白，好多人觉得我好柔弱、斯文，但我完全唔系，我系阳光女孩嚟㗎！我都宅，但我都好锺意做运动。”

学戏恶补演技

讲到她正为新剧《廉政行动2022》拍摄中，问到之前停工1年会否很彷徨时，她说：“还好，自己有趁呢段时间学戏，恶补一下。（之前被批讲对白唔好！）老师点评我嘅都好类近，佢哋话我唔能够发自内心，之前喺片场好紧张，唔知做紧乜，以为已经好投入，依家会将自己学到嘅应用落去，拍摄时自己会轻松啲。”

至于上年《迷网》播出时，她坦言压力相当大：“嗰阵我拍紧《异搜店》，我唔知自己点改善，第一次拍剧一窍不通，真系好迷惘，好多前辈有指导我，拍《异搜店》时自己都要求高咗，想做得好啲，有时间导演都容许我嚟多几Take！（有冇压力爆煲？）一开始有呀！拍《异》时一开始好惊，试过休息时会喊，又试过食食吓饭去咗厕所喊，觉得自己点解做极都做唔好，不过应该冇人发现我去咗喊。”

提到今届港姐正在面试中，贵为2018年港姐冠军的她，与之后几届的港姐都有拍剧，事业发展不俗，问会否怕很快被“过头”时，她说：“我自己冇谂过呢啲嘢，选完港姐3年，睇番以前都好似妹妹仔咁，希望试多啲唔同嘅嘢。”

同狄易达系朋友

爱情方面，之前一直有传她与狄易达翻挞，说到此时，她说：“之前啲绯闻过咗去嘞！依家我都系单身，我同佢系朋友。（唔想拍拖？）我唔急拍拖，我嚟嚟去去都系同几个女仔朋友玩，又唔觉得好需要拍拖，因为一拍拖就要谂结婚。（咁快？26岁啫喎！)系呀！所以唔想谂得咁复杂。”