母亲节靓相Battle 陈凯琳陈茵媺出Post够专业

etin

母亲节歌颂母爱伟大，喺现今社会出Post贺母亲节快乐仲紧要过送礼物，所谓物轻情义重，仔女心意固然重要，原来依家仲要有妈妈之间嘅暗地Battle！就好似已为二子之母嘅陈凯琳咁，佢一向爱搵专业摄影师帮自己影低一辑又一辑嘅家庭乐合照，今次佢为母亲节就举家去沙滩玩，拉埋老公郑嘉颖一齐凑仔，佢自己就同两个仔衬晒母子装，靓相又出炉！

冇搵摄影师帮手嘅陈茵媺，就决定自己话事自己影，成家去咗Staycation嘅佢，就晒出温馨度爆灯嘅“床照”，一张系佢自己好梳乎咁自己起床，一张就系仔女蜂拥而上揽实妈咪嘅合照，创意度满分。

第一年以妈妈身份过母亲节嘅周励淇，就行“奇招”晒畀阿仔伸一脚嘅自拍，虽然画质同构图冇得比，不过佢就行贴地一面，自爆冇收花、冇蛋糕，只有收到一只脚，真系窝心又搞笑。

而同样都系妈妈嘅杨茜尧就变番小朋友咁，同自己妈咪去主题乐园玩，拎住泡泡机嘅佢同妈妈头贴头，个开心样成个大细路咁，充满童真。锺嘉欣则多谢妈咪之馀，亦出Post多谢奶奶。​