陈德容3招冻龄似少女 陈自瑶5款养生茶保美肌

etin

冻龄女神陈德容大家听个名可能有啲陌生，但只要提起琼瑶电视剧《梅花三弄》你就会谂起佢！前年佢同地产富商王赞策结束8年婚姻，回复单身嘅佢，重返幕前，早前获剧组为佢庆祝47岁生日，照片曝光后，粉丝惊讶年近50嘅佢愈活愈年轻，骤眼睇似35岁，纷纷感叹失婚女人最漂亮！

而女神39岁陈自瑶（Yoyo），育有一女嘅佢近年状态大勇，出席大型活动定必艳压全场，仲经常喺社交网晒大量靓女相，加埋一啲鼓励女性嘅说话，愈活愈自信，令佢成为新一代家庭事业两兼顾嘅女性典范，而佢对于保养都有自己嘅一套心得，最近佢就喺短片频道公开5款养生茶，可以由内靓到外。两位女神嘅保养秘方系乜日？即刻放送！

重投娱乐圈嘅陈德容相当着重保养，社交网公开嘅相，皮肤白滑紧致，仍然保留着少女般肌肤，佢都大方公开自己驻颜秘方，以下就系佢嘅保养心得：

1.戒油炸食物

饮食以蔬果为主，戒食零食同加工食物，最重要唔好食油炸食物。每天只食1至2餐，每餐食3至5分饱，以少盐少油为原则，晚上6点后断食。

2.着重肌肤保湿

如果皮肤属敏感性肤质，日常选择护肤品要着重保湿功能，晚上会敷面膜，加强滋润肌肤。

3.着重眼部妆容

妆容要加强眼部有神嘅感觉。眼影以淡褐色或大地色系为主，画上内眼线，并喺眼尾位置稍微拉长，再加自然款假眼睫毛，眉毛画得阔啲，增加减龄效果。

陈自瑶5款养生茶保美肌，绝对童叟无欺，皆因佢喺片中玩蒙眼试味，蒙住双眼嘅佢饮一小啖都可以讲出养生茶系用咗咩材料，证明佢真系亲身试过先介绍畀网友，佢仲教大家要自备“女神暖水壶”，咁就去到边都可以养生。

以下系Yoyo介绍嘅5款养生茶

1.玫瑰石斛花茶

玫瑰花向来有“女性恩物”之称，有美容淡斑、疏肝解鬱、纾缓情绪、调节女性内分泌嘅作用，搭配被誉为“九大仙草之首”嘅石斛花，非常好嘅药用价值，即使经常饮用都唔会燥热或寒凉。

2.桑椹南枣茶

桑椹嘅营养价值同维他命C均十分丰富，而花青素更比一般水果多，且有补血养肝、明目、乌发等效果，搭配性质温和嘅南枣，有补血作用，而并非红枣嘅燥热，可以减低身体上火或生暗疮嘅机会，相当适合春天饮用。

3.洛神花玫瑰桂圆花茶

洛神花味道酸酸甜甜，可帮助消化消滞、提神，更能喺湿气重嘅春天有助去湿利尿，搭配有补血安肾作用嘅桂圆，既美颜亦能抗氧化。

4.菊花杞子茶

菊花具有清热解毒、清肝明目之功效，纾缓眼部疲劳。杞子可滋补肝肾、增强抵抗力，平衡性质寒凉嘅菊花，一凉一温，达到中和效果。

5.洋甘菊柠檬茶

洋甘菊可放松心情、纾缓紧张情绪，搭配丰富维他命C嘅柠檬，具有美白养颜作用，呢款茶味道清新酸甜，有提神作用。