蔡嘉欣晒手袋爆大镬 透明口罩袋足3个月！

etin

艺人蔡嘉欣系无綫扮靓节目《姊妹淘》嘅主持人之一，近日佢为节目拍咗条好精彩嘅“手袋大搜查”片，等大家可以八吓佢个凑仔咁大嘅袋究竟装咗啲乜！相信大家睇完可以加深对嘉欣嘅了解！

口罩、银包、电话、湿纸巾、保湿喷雾、充电器呢啲基本物品可以直接Skip！嘉欣首先展示咗个用完嘅酒精搓手液，但点解用完都仲挂喺度？全因一个懒字，继而佢拎出一个杂乱无章嘅化妆袋，一打开仲有嘢跌出嚟添，嘉欣抵死自嘲乱系好切合佢个人性格：“有啲位仲有啲Dirty，唔好意思，冇办法！但我就系锺意啲嘢咁乱，咁先系人生，人生就系唔完美，我哋唔使咁追求完美。”听落又好似畀佢讲得通咁，做主持果然有口才！

之后佢再摷咗份上星期嘅稿出嚟，佢笑言：“一直喺个袋入面唔记得拎出嚟，每一份稿我都会储，因为要拎返屋企垫枱、𦧲鸡翼骨，我系唔会浪费纸张㗎，哈哈！”虽然佢喺个袋入面加咗个间隔袋，不过睇嚟都好似冇咩用，因为啲化妆品都系周围摄。

跟住佢再拎咗个保鲜袋出嚟，入面就系装住出镜用嘅透明口罩：“公司系十分之悭俭、好有美德，就叫每一个同事尽量好好保存呢个透明口罩，因为每个成本听讲都要50几蚊，冇理由拍一次畀一个，我好支持公司呢个节俭嘅美德，就一直袋住佢，袋足⋯3个月，都冇用过，哈哈！”

最后就嚟到重头戏！嘉欣个袋入面仲有一个呕吐袋同埋竟然有支螺丝批：“有次搭公司车搭到想呕，就随身带备个呕吐袋，而支螺丝批系因为我架车有啲灯泡想换，就要用到佢，谂住摆喺个袋度等有日心情好就换咗佢，但摆咗半年都未整！失败！失败！”​