被汪明荃大赞好戏嘅陈自瑶(YoYo)由幕前捞埋幕后,个人影片频道非常受欢迎,短短3个月已经有超过6.6万订阅人次,虽然工作繁忙但佢都Keep住Upload新片,最近佢就上载咗段“第一个工作日常Vlog”,首度公开工作花絮!
一开始见佢喺度补妆,当时系朝早8点左右,佢透露6点几就要起身准备,因为当日要拍3条片!之后佢先到街市做卖菜阿姐,又落手推货,非常勤力!忙完一轮佢就买外卖饭盒上车,前往下一个拍摄地点,喺车上佢都忍唔住瞌一瞌补眠,女明星累了!本来谂住喺公园食饭盒嘅佢,担心卫生问题最终喺车上解决!
食饭时佢都趁机多谢网民支持睇佢啲片,又再解释拍片原因,系想大家多啲了解佢,或者可以同大家分享佢嘅兴趣,而自己就好锺意“一日体验系列”嘅片,可以了解各行各业,感受好多嘢!虽然拍片要自己构思、谂题目、联络人等,演员做埋制作人好忙,但佢都话好开心同值得!最后佢笑言好多人都话佢好瘦,系咪成日节食,佢就笑言其实好大食:“其实唔系,我系好大食,成个饭盒食晒㗎!”由朝踩到晚嘅佢,终于顺利拍咗3条片,啲铺头都闩晒先有时间食晚饭,真系忙足全日呀!网民都留言大赞“未见过咁靓嘅制作人,美貌与智慧都有”,又问“王浩信会唔会心痛,你咁辛苦”?​
|