同朱晨丽咩关系？何广沛自爆拍拖最短10日就分手

etin

艺人何广沛与朱晨丽传绯闻多年，他笑言因合作较多所致：“我哋系比较深入民心，每个演员都希望大家记得自己，萤幕情侣有人记得系好事，证明我哋成功咗，我觉得厌还厌， 但我受！”问目前有否拍拖？他故弄玄虚说：“你估吓！我会集中事业先。（唔公开？）顺其自然，我呢5个月试好多唔同方向，冇时间谂其他嘢，希望可以去到一个位置，令我之后可以成为心目中嘅男人， 一步一步向前推动。”

他在剧集《爱美丽狂想曲》饰演手游公司老板，有钱有才又年轻，追女仔勇于表白又浪漫到极致。不过，他指自己在感情世界属于较为被动及怕丑类型，虽不及剧中角色浪漫，但都会为另一半花心思：“我唔识煮嘢食，但为对方煮嘢食同整生日蛋糕都试过，虽然我劳作同画画唔叻，冇艺术天分，但我想畀对方感受到心意。”剧中，他与李佳芯共谱姊弟恋，现实中他就未试过：“拍呢套剧之前，如果姊弟恋，相差5至10年，我未必会接受。拍完呢套剧发现年龄都唔系啲乜，最重要啱Feel。（母子恋呢？）唔得，10年或以上系心理关口。（细你几多可以接受？）以前拍拖对象都只系细我2、3年，如果对方20岁，我沟通唔到， 大家文化差好远，好难想像。”

5年情尽　检讨不足

问到拍拖经验，他透露最长一段感情是5年，最短只有10日，因为开始之后随即展开半年远距离恋爱：“嗰半年冇见过面，好空虚，只可以靠长途电话联络，我唔觉得系拍紧拖，喺冇感情基础下开始，好难维系。我觉得如果明知一个月后就走，但仍然去开始一段关系，系不负责任，但当时我系喺不知情嘅情况下开始。”他庆幸每次都是和平分手，从没涉及第三者。至于5年情尽的原因，他称主要是双方价值观不同：“女人永远比男人想得远，我嗰刻唔够成熟，佢要嘅嘢嗰刻我畀唔到，所以系一个好经验，知道自己嘅不足，上咗一课，希望未来唔好重蹈覆辙。”

他曾经希望28岁成家立室，可是入行后就再没这个想法：“5年嗰段恋情令我发现自己不足，我知道如果要结婚，我嘅事业应该要去到某一个成就、一个位置令对方生活无忧，我觉得未做到，所以唔谂住。我仲可以喺事业上再努力，有能力照顾对方先谂，有啲人会话结咗婚先一齐挨，我反而唔想。（对自己事业有咩要求？）能够做到安稳生活，呢行好多不明因素，唔系你可以控制。（买楼先？）最好啦！我连楼都冇， 几唔稳定。”

手停口停 反思创业

大学读会计，但他忠于自己，决定入行做艺人，由于初时收入低微、工作机会少加上竞争大，令父母非常担忧。而收入最低的时期， 应是当年读训练班：“真系得车马费津贴，好在我之前有做兼职，有积蓄，我喺美国连家俬都搬。（当时畀父母经济封锁？）又唔系，只系唔会畀钱你，但有间房畀你瞓，当时好节俭，逼你一定要向前行。”

直至近年在圈中略见成绩，父母开始放心，可惜疫情来袭，5个月冇工开，两老又再为他忧心忡忡，不禁令他作出反思：“唔想限于演员身份，娱乐圈真系手停口停，呢一刻庆幸仲有剧拍，如果自己身体问题唔再适合拍剧， 我仲有咩选择？呢个系疫情带畀我启示，我开始去做生意仔，已经运作中，F&B（餐饮）、网上商店、App都有，同唔同老板、拍档合作。”