【冇偶像包袱】郭富城演沉鬱爸爸 一见爱女即抽离

etin

影帝郭富城在电影《秘密访客》饰演高冷沉鬱的父亲，问到可有难度？他坦言：“其实当时拍紧《麦路人》，2部一齐拍，挑战系因为《麦》我系流浪者，但呢套戏我就系大家族、好有钱，所以身份好大对比，但故事好扎实，所以容易进入角色。”他透露此电影在疫情前飞去韩国拍：“因为嗰度嘅屋有地牢，好适合个故事，拍咗2个几月，冇戏份时就飞返香港拍《麦》。”

讲到其角色沉重，可会难抽离？城城坦言：“返到屋企一见到小朋友就会抽离到，自己识调整心情。（最难抽离系边个角色？）《杀人犯》，拍完做访问会谂番个回忆，当时宣传期发梦都系梦见杀人同埋尸。（几耐先抽离到？）宣传完，当时又有好多兴趣，会赛车，分散咗就冇事。”提到他常拍摄沉重角色，可想挑战喜剧？他坦言：“想㗎，希望多方面尝试，想试好多戏路，演员冇包袱，之前大部分都系演剧情片，可能喜剧导演少啲，我近10年都冇演过喜剧。（你有冇喜剧细胞？）要慢慢发掘吓，我都Funny㗎，我冇偶像包袱。（爸爸包袱呢？）更加冇啦！（喺囡囡面前呢？）喺囡囡面前就要凼佢哋开心。”

讲到近来他迷上书法，他坦言：“因为上年疫情关系，多咗时间喺屋企，有朋友系画家，我都有收藏啲画，收藏咗10几幅赵无极嘅画，之后再搵老师学写字。（你有冇天分？）人人都有，每人都得嘅，最紧要学习同勤力。（会唔会一家人一齐写？）囡囡系儿童班，学紧认字，都有教佢写字。”讲到他的兴趣由动变静，他表示：“因为依家冇得玩赛车嘛，因应个时势转变，都少咗好多揸车。”工作方面，他透露5月会开戏，亦预告今年会再举办演唱会。