戴祖仪偷咀丁子朗穿煲 愈咀愈激

etin

无綫新剧《青春不要脸》日前去到元朗拍摄外景，戴祖仪（Joey）、丁子朗及余德丞（Dickson）齐齐穿上校服，拍摄上堂、影毕业相、行毕业典礼等场口，不过重头戏就落在Joey及子朗的激吻情节上，剧情讲到因为Dickson意外令谢幕布帘打开，全场所有人就睇到一对小情侣Sweet爆锡锡！

由于2人已经拍了埋身肉搏的生擒戏码，问到男方是否觉得斋锡锡就比较轻易？他笑说：“个个都问我紧唔紧张，之前爱情动作戏都拍咗，中间亦咀过几次，所以完全轻松简单，我仲谂紧等阵晚饭食咩好！”又抵死形容跟Joey关系似兄弟：“就好似兄弟咁吹完水就咀，呢次咀嘴，仲要系好有深度同长度，系蜻蜓点水之后再激咀！”

几百对眼望实

虽然这场亲密戏对于子朗来说只是小儿科，Joey却指是达到三级程度，因为现场有几百对眼监视住：“觉得生擒戏都系一、两级咁冇乜嘢，呢个锡锡先系三级！难度在于通常有亲热、锡嘅动作，你都唔会喺好多人面前做，就算好Friend嘅朋友，最多都系蜻蜓点水，但我哋喺一班人面前、畀佢哋望住嚟锡，我就觉得好难、好紧张，所以成件事对我嚟讲系三级咁难，个感觉好赤裸！”

闹余德丞“老鼠屎”

她亦不忘代入戏中角色“感谢”Dickson搞大件事，嘲笑对方根本就是“老鼠屎”般存在：“系佢唔小心揿咗个制，令个帘开咗，全世界就见到我哋锡！都不特止，仲要意犹未尽咁继续锡，所以成件事好青春。”亲吻前有做准备？她即“投诉”子朗不怜香惜玉：“拍呢啲场口绝对要食香口胶，有嘢食味都唔系几好，要尊重个对手，唔似丁子朗成日都话要食洋葱，就嚟打死佢！”她又预告之后会再有激烈场口，更达四级程度：“就喺我戏入面个屋企发生！”

另外，有“校服KOL”美誉的她，笑谓着校服的青春感仍在：“当年毕业典礼嘅画面重现，好挂住嗰个感觉，今次仲可以影毕业相，以前做学生唔识化妆、唔识望镜笑，通常啲毕业相都系‘炒车’，唔好睇嘅，好开心终于有个机会畀我影番张唔系‘炒车’嘅！”但拍摄毕业场口对子朗就好有新鲜感，因为他于13岁便出国读书，之后鲜有机会再着起校服。​