JW衰心软原谅贱男 谭嘉仪专一急撇叛侣

etin

歌手JW（王灏儿）曾受感情重创，遇着几位前度都偷食，认真惨情！但她见过鬼仍不怕黑，更衰心软，以为可以改变男友，原谅了对方又再一起，但最后只换来再次被背叛！至于谭嘉仪亦曾遇上花心贱男，但她有截然不同的睇法，直言完全接受不到，认为一次不忠，百次不用！

JW读中学时已拍拖，但次数不多，并自爆有不愉快经历，试过被男友欺骗，虽然接受不到对方偷食，但就衰心软：“中间一定有心软、畀人凼到，我谂女仔好多时有个感觉，觉得自己可以改变男友，或者希望佢会因为你而改变，所以会心软、原谅佢，但最后都系又发生！”

“我唔系易呃”

她自爆几位前度都试过偷食：“所以嗰啲好快系过去式。（你成日遇人不淑，好易呃？）我唔系易呃，我都几快发现，我谂系因为细个好多男仔都想识多啲女仔玩吓。（你原谅佢哋？）系呀，个个男仔或女仔细个嗰阵，梗系想经历爱情唔同嘅嘢，而呢啲经历都令我慢慢累积经验，每次都会上咗一课，变咗更好嘅人！”

曾是黐身女友

经历多次被背叛，问到可会变得识拣好男友？现有稳定男友Tarzan的她坦言：“唔可以话识拣，依家呢个都系缘分，喺啱嘅时候遇到呢个人。”并直认以前是黐身女朋友，经常Check男友行踪：“细个男仔都锺意玩，信任一定冇咁多，但依家大个咗，大家都定落嚟，最宝贵系信任。同埋依家唔需要太黐身，因为同男友嘅朋友圈融合咗。”

自认恋爱经验少的谭嘉仪，对上一段恋情惨被背叛：“佢完全冇当过我系女朋友，收埋几个女仔，不断喺电话调情。拍咗拖2、3个月，有晚深夜有啲女仔搵佢，佢个样即刻好惊青，唔使问都已经估到，之后佢就突然失踪！佢平时做到自己好诚实，好似咩都同你讲，但原来真实系咁，反差太大，本身对佢期望好高，之后跌到好低。”

“我思想传统”

嘉仪直言完全接受不到男友偷食：“一次不忠，百次不用，我思想比较传统，要一心一意对一个人。（就算佢求你都唔会心软？）唔会，如果爱一个人，点会做呢啲嘢伤害佢？”

唔Check行踪

嘉仪坦言自此有阴影，有段时间不敢拍拖：“嗰排对爱情完全冇晒信心，觉得以后都唔会搵到自己锺意嘅人。后尾时间过去，心情都平复咗，睇吓遇唔遇到一个啱嘅人。”嘉仪自认不算黐身女友，更不会Check男友行踪：“可能开头会紧张啲，但信任咗佢之后，过咗一排就会知佢个人系点，就会好放心，可能佢要做嘢，唔见咗几个钟，都唔会觉得出奇。”